(आळंदी प्रतिनिधी रवी कदम ) आळंदी-दिघी रस्त्यावर धक्कादायक घटना; मित्रानेच मित्राची गोळी झाडून हत्या
आळंदी-दिघी रस्त्यावर बुधवारी सायंकाळी एक धक्कादायक घटना घडली आहे. अलंकापुरम चौकाजवळ मित्रानेच मित्राच्या डोक्यात गोळी झाडून हत्या केल्याची माहिती समोर आली आहे. या गोळीबारात ३७ वर्षीय नितीन शंकर गिलबिले यांचा मृत्यू झाला आहे.
मिळालेल्या माहितीनुसार, ही घटना सायंकाळी साडेपाच ते सहा वाजण्याच्या दरम्यान अलंकापुरम ९० फुटी रोडवरील ‘श्री साई रोड कॅरिअर’ कार्यालयाजवळ घडली. काळ्या रंगाच्या फॉर्च्यूनर गाडीत तिघे मित्र बसलेले असताना अचानक वाद निर्माण झाला आणि त्यातून संशयित अमित जीवन पठारे (रा. पठार मळा) आणि विक्रांत ठाकूर (रा. सोलू खेड) यांनी नितीन गिलबिले यांच्यावर गोळीबार केला.
गोळीबारात गंभीर जखमी झालेल्या नितीन गिलबिले यांना तात्काळ रुग्णालयात हलविण्यात आले. मात्र उपचारादरम्यान त्यांचा मृत्यू झाला.
प्राथमिक माहितीनुसार, नितीन गिलबिले, अमित पठारे आणि विक्रांत ठाकूर हे तिघेही जिवलग मित्र होते. हे तिघे जमिनांच्या प्लॉटिंगच्या व्यवसायात एकत्र होते. व्यवसायातील व्यवहारांच्या वादातून ही घटना घडली असावी, अशी शक्यता पोलिसांनी व्यक्त केली आहे.दिघी पोलीस स्टेशनतर्फे मोठी शोध मोहीम राबवली जात आहे. या प्रकरणातील संशयित अमित जीवन पठारे आणि विक्रांत ठाकूर हे घटनेनंतर पसार झाले असून अद्याप त्यांचा शोध लागलेला नाही.
या दोघांचा माग काढण्यासाठी दिघी पोलिसांनी विशेष अशी पाच पथके तयार केली आहेत. शहरातील तसेच ग्रामीण भागातील विविध ठिकाणी शोधमोहीम सुरू असून दोन्ही आरोपींना लवकरात लवकर ताब्यात घेण्यासाठी पोलिसांकडून सर्वतोपरी प्रयत्न चालू आहेत.
✍🏻मुख्य संपादक – रोहिदास कदम
