बाणेगाव/सौंदल तालुका धनसावंगी प्रतिनिधी राहुल बोबडे )
गोदावरी नदीचे पात्र सध्या वाळू माफियांच्या विळख्यात सापडले असून बाणेगाव आणि सौंदल परिसरात मोठ्या प्रमाणावर अवैध वाळू उपसा सुरू असल्याचा गंभीर प्रकार उघडकीस आला आहे. दिवस-रात्र लेबर कामगार ट्रॅक्टर आणि डंपर सहाय्याने नदीपात्रातून वाळूचा बेकायदेशीर उपसा केला जात असून प्रशासन मात्र याकडे कानाडोळा करत असल्याचा आरोप ग्रामस्थांकडून केला जात आहे.
नदीपात्राचे विद्रुपीकरण; पर्यावरण धोक्यात
अवैधरित्या वाळू उपसल्यामुळे गोदावरी नदीच्या पात्रात मोठमोठे खड्डे निर्माण झाले आहेत. नदीचा नैसर्गिक प्रवाह बदलत असून भूजल पातळीवरही त्याचा परिणाम होण्याची शक्यता तज्ज्ञांकडून व्यक्त केली जात आहे. भविष्यात पाण्याची टंचाई निर्माण होण्याची भीती नागरिकांमध्ये व्यक्त होत आहे.
रात्रंदिवस सुरू वाहतूक
स्थानिकांच्या माहितीनुसार, रात्रीच्या अंधाराचा फायदा घेत शेकडो ब्रास वाळूचा उपसा केला जात आहे. ट्रॅक्टर आणि डंपरद्वारे ही वाळू विविध भागात पोहोचवली जात असून महसूल विभाग व पोलीस प्रशासनाकडून ठोस कारवाई होत नसल्याने वाळू तस्करांचे मनोबल वाढल्याचे दिसून येत आहे.
ग्रामस्थांचा संताप
“वाळूची वाहने खुलेआम गावातील रस्त्यांवरून धावत आहेत. तक्रार केल्यानंतरही कारवाई होत नाही. उलट प्रश्न विचारणाऱ्यांनाच दमदाटी केली जाते,” असा संताप स्थानिक नागरिकांनी व्यक्त केला आहे. या प्रकारामुळे ग्रामस्थांमध्ये तीव्र नाराजी पसरली आहे.
जिल्हाधिकाऱ्यांनी लक्ष घालण्याची मागणी
गोदावरी नदीचे अस्तित्व वाचवण्यासाठी आणि पर्यावरणीय हानी रोखण्यासाठी जिल्हाधिकारी, महसूल विभाग आणि पोलीस प्रशासनाने तातडीने संयुक्त मोहीम राबवून वाळू माफियांवर कठोर कारवाई करावी, अशी मागणी नागरिकांकडून होत आहे.
गोदावरी नदी वाचवायची की वाळू माफियांना मोकळे रान द्यायचे?
या प्रश्नाचे उत्तर आता प्रशासनानेच द्यावे, अशी भावना नागरिकांमध्ये व्यक्त होत आहे.
✍🏻मुख्य संपादक – रोहिदास कदम
