पुणे |प्रतिनिधी अशोक कुंभार) पुण्यातील सिंहगड रोड परिसरात लोकशाहीर अण्णाभाऊ साठे जयंतीनिमित्त आयोजित कार्यक्रमादरम्यान झालेल्या वादाचे पर्यवसान एका २२ वर्षीय तरुणाच्या निर्घृण हत्येत झाले. डीजेवरून सुरू झालेल्या वादानंतर सुमारे १५ जणांच्या टोळक्याने संबंधित तरुणावर लाठ्या, काठ्या आणि धारदार शस्त्रांनी हल्ला केल्याची माहिती समोर आली आहे. गंभीर जखमी झालेल्या तरुणाचा उपचारादरम्यान मृत्यू झाला
घटनेनंतर सिंहगड रोड परिसरात तणावाचे वातावरण निर्माण झाले असून पोलिसांनी तातडीने घटनास्थळी धाव घेत परिस्थिती नियंत्रणात आणली. या प्रकरणी संबंधित आरोपींविरुद्ध खुनाचा गुन्हा दाखल करण्यात आला असून काही संशयितांना ताब्यात घेण्यात आल्याची माहिती पोलिसांनी दिली आहे. फरार आरोपींचा शोध सुरू असून सीसीटीव्ही फुटेज आणि प्रत्यक्षदर्शींच्या जबाबांच्या आधारे तपास वेगाने सुरू आहे.
पोलिसांनी नागरिकांना अफवांवर विश्वास न ठेवण्याचे आवाहन केले असून परिसरात अतिरिक्त पोलीस बंदोबस्त तैनात करण्यात आला आहे. या घटनेमुळे शहरात पुन्हा एकदा कायदा व सुव्यवस्थेचा प्रश्न ऐरणीवर आला आहे.
✍🏻मुख्य संपादक – रोहिदास कदम
