अंबाजोगाई, प्रतिनिधी (मेघा चाटे) : परळी वैजनाथ तालुक्यातील मातोश्री चंद्रभागा आश्रम, वैद्यनाथ मंदिराच्या पूर्वेस तुकाई रोड येथे परमपूज्य वै. ह. भ. प. गुरुवर्य मृदंड महर्षी ज्ञानोबा माऊली लटपटे महाराज यांच्या मठावर गुरुपौर्णिमेनिमित्त विविध धार्मिक कार्यक्रमांचे भक्तिमय वातावरणात आयोजन करण्यात आले. हा सोहळा बुधवार, दि. २९ जुलै २०२६ रोजी मोठ्या उत्साहात पार पडला.
कार्यक्रमाची सुरुवात गुरुपूजनाने झाली. त्यानंतर हरिनाम संकीर्तन, कीर्तन, भजन आणि आध्यात्मिक प्रवचनांद्वारे उपस्थित भाविकांना भक्तिरसाची अनुभूती मिळाली. परिसरात दिवसभर “जय जय राम कृष्ण हरी” व विठ्ठलनामाच्या गजराने आध्यात्मिक वातावरण निर्माण झाले.
यावेळी नामदेव महाराज फडातील मृदंग विशारद तसेच अनेक वारकरी, भाविक आणि ग्रामस्थ मोठ्या संख्येने उपस्थित होते. गुरुपौर्णिमेचे महत्त्व सांगताना गुरूंच्या मार्गदर्शनातूनच जीवनाला योग्य दिशा मिळते, असा संदेश कीर्तनातून देण्यात आला.
कार्यक्रमाच्या यशस्वी आयोजनासाठी आश्रमातील सेवेकरी, वारकरी संप्रदायातील भक्तगण आणि सर्व सहकाऱ्यांनी परिश्रम घेतले.
प्रतिनिधी : मेघा चाटे, मानव मित्र न्यूज. 
✍🏻मुख्य संपादक – रोहिदास कदम
