प्रतिनिधी अशोक कुंभार)
सासवड (ता. पुरंदर | जि. पुणे):
पुणे जिल्ह्यातील पुरंदर तालुक्यातील सासवड शहरात हडपसर रोड येथील हिवरकर मळा, भोंगळे पेट्रोल पंप समोर ग्रेट जेंगो सर्कस प्रेक्षकांच्या मनोरंजनासाठी सज्ज झाली आहे. दररोज तीन खेळांचे आयोजन करण्यात आले असून दुपारी १.००, ४.०० आणि सायंकाळी ७.०० वाजता सर्कसचे खेळ सुरु होत आहेत.
सांगली जिल्ह्यातील तासगाव येथून सन १९७८ साली सुरू झालेली ग्रेट जेंगो सर्कस ही महाराष्ट्रातील एकमेव मराठी सर्कस म्हणून ओळखली जाते. अनेक चढ-उतारांवर मात करत आजही ही सर्कस प्रेक्षकांचे भरभरून मनोरंजन करत असून परंपरागत कलेची जपणूक करत आहे.
सद्यस्थितीत या सर्कसमध्ये ३५ कलाकार विविध कौशल्यपूर्ण खेळ सादर करत आहेत. यामध्ये चिंपांजीचे खेळ, फायर डान्स, हायस्पीड मोटार सायकल ‘मौत का कुआ’, इंडिया गॉट टॅलेंट विजेते मणिपुरी ग्रुपचे विशेष सादरीकरण, हुल्ला हूप रिंग डान्स, अरेबियन डान्स, तसेच तलवार स्टंट व रिंग डान्स अशा अनेक चित्तथरारक व मनोरंजक खेळांचा समावेश आहे.
लहान मुलांसाठी सर्कसमध्ये खास आकर्षण ठेवण्यात आले आहे. जोकरांचे विनोदी आणि हास्यप्रधान सादरीकरण, विविध खेळ तसेच आवडत्या कार्टून कॅरेक्टर्ससोबत सेल्फी काढण्याची संधी उपलब्ध असल्याने लहानग्यांमध्ये विशेष उत्साह पाहायला मिळत आहे.
आजच्या मोबाईल व सोशल मीडियाच्या युगात सर्कससारखी पारंपरिक कला हळूहळू लोप पावत चालली आहे, ही चिंतेची बाब आहे. ही कला जिवंत ठेवण्यासाठी पुरंदर तालुक्यातील सर्व नागरिकांनी आणि प्रेक्षकांनी कुटुंबासह ग्रेट जेंगो सर्कसला आवर्जून भेट द्यावी, असे आवाहन सर्कस प्रशासनाच्या वतीने करण्यात आले आहे.
✍🏻मुख्य संपादक – रोहिदास कदम
