पिंपरी-चिंचवड(प्रतिनिधी योगेश भाऊ भोसले पाटील)
पिंपरी-चिंचवड महापालिकेत पुन्हा एकदा सत्ता काबीज करण्याचं स्वप्न पाहणाऱ्या अजित पवार गटाला मोठा राजकीय धक्का बसणार असल्याचं स्पष्ट संकेत मिळत आहेत. आज मुंबईत पिंपरी-चिंचवड शहरातील विविध पक्षांतील एकूण १५ माजी नगरसेवक व पदाधिकाऱ्यांचा भाजपमध्ये जाहीर प्रवेश होणार आहे. या घडामोडीमुळे शहराच्या राजकारणात मोठी खळबळ उडाली आहे.
भाजपकडून करण्यात येणाऱ्या या प्रवेश सोहळ्यात अजित पवार गटातील माजी महापौरांचा मुलगा, माजी स्थायी समिती अध्यक्ष, माजी उपमहापौर तसेच अनेक माजी नगरसेवकांचा समावेश आहे. विशेष म्हणजे ठाकरे गट व शरद पवार गटातील काही नेतेही भाजपमध्ये प्रवेश करणार असल्याने महाविकास आघाडी व राष्ट्रवादीतील अंतर्गत समीकरणांवर याचा मोठा परिणाम होण्याची शक्यता वर्तवली जात आहे.
भाजपमध्ये प्रवेश करणारे प्रमुख नेते पुढीलप्रमाणे :
संजोग वाघेरे – शहराध्यक्ष, ठाकरे गट
उषा वाघेरे – माजी स्थायी समिती अध्यक्षा, अजित पवार गट
प्रभाकर वाघेरे – माजी उपमहापौर, अजित पवार गट
प्रशांत शितोळे – माजी अध्यक्ष, स्थायी समिती, अजित पवार गट
नवनाथ जगताप – माजी अध्यक्ष, स्थायी समिती (शरद पवार गट)
राजू मिसाळ – माजी उपमहापौर, अजित पवार गट
समीर मासुळकर – माजी नगरसेवक, अजित पवार गट
रवी लांडगे – भाजपचे माजी नगरसेवक (सध्या ठाकरे गट)
जालिंदर शिंदे – माजी नगरसेवक, अजित पवार गट
अमित गावडे – माजी नगरसेवक, ठाकरे गट
संजय काटे – माजी अपक्ष नगरसेवक, महायुतीचे कार्यकर्ते
मीनल यादव – माजी नगरसेविका, ठाकरे गट
कुशाग्र कदम – माजी महापौर मंगला कदम यांचे सुपुत्र
प्रसाद शेट्टी – माजी नगरसेवक, अजित पवार गट
विनोद नढे – माजी नगरसेवक, अजित पवार गट
या नेत्यांचा प्रवेश भाजपसाठी मोठी ताकद मानली जात असून, आगामी महापालिका निवडणुकांच्या पार्श्वभूमीवर भाजपने पिंपरी-चिंचवडमध्ये आपली संघटनात्मक पकड अधिक मजबूत केल्याचं चित्र आहे. दुसरीकडे, अजित पवार गटासाठी हा मोठा राजकीय धक्का मानला जात असून, पक्षातील नाराजी आणि गळती पुन्हा एकदा उघड झाल्याची चर्चा राजकीय वर्तुळात सुरू आहे.
आज मुंबईत होणाऱ्या या प्रवेश सोहळ्याकडे संपूर्ण राज्याचं लक्ष लागलं असून, यानंतर पिंपरी-चिंचवडच्या राजकारणात नवे समीकरण तयार होण्याची शक्यता व्यक्त केली जात आहे. 
प्रतिनिधी योगेश भोसले
✍🏻मुख्य संपादक – रोहिदास कदम
