(पुरंदर सासवड प्रतिनिधी अशोक कुंभार ) आळंदी येथे बहुभाषिक कीर्तन महोत्सवाला उत्स्फूर्त प्रतिसाद
जानकाई वेदांत स्वाध्याय प्रतिष्ठान यांच्या वतीने आळंदी येथे आयोजित बहुभाषिक कीर्तन महोत्सवाला मोठा प्रतिसाद मिळत आहे. रविवार दि. 12 एप्रिल 2026 रोजी सुरू झालेला हा महोत्सव रविवार दि. 19 एप्रिल 2026 रोजी संपन्न होणार आहे.
गेल्या दहा वर्षांपासून प्रतिष्ठान संत विचारांचा प्रचार-प्रसार करत असून मराठी संत साहित्य हिंदी, इंग्रजी तसेच इतर भाषांमध्ये उपलब्ध करून देण्याचे कार्य सुरू आहे. संत ज्ञानेश्वर महाराज यांचे पसायदान तसेच हरिपाठ, चांगदेव पासष्टी यांचे विविध भाषांमध्ये भाषांतर करण्यात आले आहे. तसेच संत मुक्ताबाई यांच्या ताटीच्या अभंगांवर आधारित ग्रंथाचेही प्रकाशन करण्यात आले आहे.
या महोत्सवात बहुभाषिक कीर्तनांसोबतच अभ्यासक-उपासक परिसंवादाचे आयोजन करण्यात आले आहे. तसेच डेक्कन कॉलेज मधील विद्वान प्राध्यापकांच्या समन्वयाने अमृत अनुभव या ग्रंथावर शास्त्रचर्चा आयोजित करण्यात आली आहे. विविध संगीत भजनांचेही आयोजन करण्यात आले असून आध्यात्मिक अनुभव कथन हा विशेष परिसंवाद कार्यक्रमही आयोजित करण्यात आला आहे.
युवक-युवतींमध्ये संस्कार रुजावेत, समाजात सुख-शांती निर्माण व्हावी आणि संत विचारांचा प्रसार व्हावा या उद्देशाने हा महोत्सव आयोजित करण्यात आला आहे. महाराष्ट्रभर या महोत्सवाची माहिती पोहोचावी व जास्तीत जास्त लोकांनी लाभ घ्यावा असे आवाहन प्रतिष्ठानच्या वतीने करण्यात आले आहे.
महोत्सवामध्ये विविध मान्यवर कीर्तनकारांची उपस्थिती लाभणार असून हा बहुभाषिक कीर्तन महोत्सव आळंदीतील आध्यात्मिक वातावरण अधिक समृद्ध करणारा ठरत आहे.
✍🏻मुख्य संपादक – रोहिदास कदम
