मानव मित्र न्यूज प्रतिनिधी माऊली घुंडरे
रस्त्यावरील अतिक्रमण, वाहतूक कोंडी आणि नागरिकांची गैरसोय दूर करण्यासाठी नगरपरिषदेची मोठी हालचाल
चाकण शहरातील अनेक वर्षांपासून प्रलंबित असलेला कायमस्वरूपी भाजी मंडई आणि हॉकर्स झोनचा प्रश्न अखेर मार्गी लागण्याची चिन्हे दिसू लागली आहेत. शहरातील वाढती लोकसंख्या, औद्योगिक विस्तार आणि दिवसेंदिवस वाढणारी वाहतूक लक्षात घेता चाकण नगरपरिषद प्रशासनाने या प्रश्नावर ठोस पावले उचलण्यास सुरुवात केली आहे.
सध्या शहरातील अनेक भाजी विक्रेते आणि फेरीवाले मुख्य रस्ते, चौक आणि पदपथांवर व्यवसाय करत असल्याने वाहतुकीला मोठा अडथळा निर्माण होत आहे. त्यामुळे नागरिकांना दररोज वाहतूक कोंडी, पादचाऱ्यांची गैरसोय आणि अपघाताच्या धोक्याचा सामना करावा लागत आहे.
दरम्यान, विक्रेत्यांकडून शुल्क आकारले जात असले तरी त्यांना आणि नागरिकांना आवश्यक मूलभूत सुविधा मिळत नसल्याबाबत नाराजी व्यक्त केली जात आहे. विशेषतः स्वच्छतागृहे, पिण्याचे पाणी आणि नियोजित जागांचा अभाव असल्याने अनेक सामाजिक संघटनांनी प्रशासनाकडे वारंवार मागणी केली आहे.
या पार्श्वभूमीवर चाकण नगरपरिषदेचे मुख्याधिकारी डॉ. अंकुश जाधव यांनी शहरासाठी नियोजनबद्ध हॉकर्स धोरण राबविण्याची माहिती दिली आहे. या योजनेअंतर्गत प्रमुख चौक, शाळा, बसस्थानके, धार्मिक स्थळे आणि गर्दीची ठिकाणे ‘नो-हॉकर झोन’ म्हणून निश्चित करण्यात येणार असून, इतर योग्य ठिकाणी अधिकृत हॉकर्स झोन विकसित करून भाजी विक्रेते व फेरीवाल्यांना व्यवसायासाठी स्वतंत्र जागा उपलब्ध करून दिली जाणार आहे.
या निर्णयाची प्रभावी अंमलबजावणी झाल्यास शहरातील वाहतूक कोंडी कमी होण्यास मदत होईल, नागरिकांना मोकळे व सुरक्षित पदपथ उपलब्ध होतील आणि विक्रेत्यांनाही सन्मानाने व्यवसाय करण्यासाठी आवश्यक सुविधा मिळतील, अशी अपेक्षा व्यक्त होत आहे.
आता नगरपरिषदेच्या या घोषणेनंतर प्रत्यक्षात कामाला किती वेग मिळतो आणि चाकणकरांची अनेक वर्षांची प्रतीक्षा कधी संपते, याकडे सर्वांचे लक्ष लागले आहे.
✍🏻मुख्य संपादक – रोहिदास कदम
