आळंदी (संपादक रोहिदास कदम ) : तीर्थक्षेत्र आळंदी येथील बाह्यवळण मार्गावर साचलेल्या कचऱ्याचे साम्राज्य हटविण्यासाठी नगरपरिषद प्रशासनाने अखेर मोहीम हाती घेतली आहे. अस्वच्छतेबाबतचा व्हिडिओ सोशल मीडियावर व्हायरल झाल्यानंतर प्रशासनाने तातडीने दखल घेत दुतर्फा स्वच्छतेचे काम सुरू केले.
नगरपरिषदेचे मुख्याधिकारी माधव खांडेकर यांच्या निर्देशानुसार आरोग्य विभागाने जेसीबीच्या सहाय्याने रस्त्याच्या दोन्ही बाजूंवरील कचरा उचलण्याची मोहीम राबवली. साचलेला कचरा संकलित करून ट्रॅक्टर व ट्रकद्वारे पुढील विल्हेवाटीसाठी पाठविण्यात आला.
मुख्याधिकारी माधव खांडेकर यांनी नागरिक व भाविकांना कचरा घंटागाडीतच देण्याचे तसेच सार्वजनिक ठिकाणी कचरा न टाकण्याचे आवाहन केले आहे. आळंदी लगतच्या केळगाव व चऱ्होली खुर्द परिसरातील काही नागरिक बाह्यवळण मार्गावर कचरा टाकत असल्याची तक्रार असून, यामुळे मोठ्या प्रमाणात घाण व दुर्गंधी पसरली होती. यामुळे भाविक व स्थानिक नागरिकांनी नाराजी व्यक्त केली होती.
जनजागृतीसाठी महत्त्वाचे मुद्दे :
जसे आपण आपले घर स्वच्छ ठेवतो, तसेच सार्वजनिक ठिकाणेही आपलीच जबाबदारी आहे, ही भावना प्रत्येकाने मनात ठेवणे आवश्यक आहे.
रस्त्यावर टाकलेला कचरा केवळ घाणच निर्माण करत नाही, तर तो रोगराईलाही आमंत्रण देतो.
प्लास्टिक, उरलेले अन्न आणि ओला कचरा वेगवेगळा करून देणे ही प्रत्येक नागरिकाची जबाबदारी आहे.
धार्मिक स्थळी येणाऱ्या भाविकांनी “स्वच्छता हीच सेवा” मानून परिसर स्वच्छ ठेवण्यास सहकार्य करावे.
कचरा टाकणाऱ्यांवर दंडात्मक कारवाई होऊ शकते, याची जाणीव नागरिकांनी ठेवावी.
:
“माझे शहर – माझी जबाबदारी” ही भावना अंगीकारल्यासच आळंदी सारख्या पवित्र तीर्थक्षेत्राचे सौंदर्य टिकून राहील. प्रशासनाच्या कारवाईसोबतच नागरिकांचा सक्रिय सहभाग हीच खरी स्वच्छतेची गुरुकिल्ली आहे.
✍🏻मुख्य संपादक – रोहिदास कदम
