( पुणे खेड वार्ताहरसंदीप मुंगसे)
पुणे, दि. ११ जुलै : पुण्यातील वाघोली येथील सीझन्स बँक्वेट हॉल येथे आज (११ जुलै) एकदिवसीय ओशो ध्यान शिबिर उत्साहपूर्ण आणि आध्यात्मिक वातावरणात संपन्न झाले. सकाळी ८ वाजता गुरु वंदनेने शिबिराची सुरुवात झाली. दिवसभर विविध ध्यानप्रयोग, भजन, नृत्य आणि ओशोंच्या अमृतवाणीने संपूर्ण परिसर आनंदमय झाला.
शिबिराचे मार्गदर्शन स्वामी दर्शन सिंह, स्वामी हिमांशु आणि स्वामी संदीप भाऊ मुंगसे यांनी केले. तर प्रसिद्ध तबलावादक सोहम श्याम गोराणे यांनी आपल्या तबलावादनाने ध्यान प्रक्रियेला विशेष आध्यात्मिक ऊर्जा दिली.
शिबिराची सुरुवात नादब्रह्म ध्यानाने करण्यात आली. त्यानंतर डिव्हाईन साउंड हीलिंग चक्र मेडिटेशन हा विशेष ध्यानप्रयोग सुमारे ५० साधकांच्या सहभागातून पार पडला. या ध्यानप्रयोगादरम्यान सहभागी साधकांनी शांतता, आनंद आणि अंतर्मनाशी संवाद साधल्याचा अनुभव व्यक्त केला.
दिवसभर चाललेल्या विविध ध्यानप्रयोगांमध्ये सहभागी साधकांनी उत्स्फूर्त सहभाग नोंदविला. भजन, नृत्य आणि ध्यानाच्या माध्यमातून उपस्थितांना ओशोंच्या विचारांचा आणि अमृतवाणीचा लाभ मिळाला. संपूर्ण शिबिरात आनंद, उत्साह आणि सकारात्मक ऊर्जेचे वातावरण अनुभवायला मिळाले.
या एकदिवसीय ध्यान शिबिराने सहभागी साधकांना आत्मशांती, अंतर्मनातील स्थैर्य आणि जीवनाकडे सकारात्मक दृष्टीने पाहण्याची प्रेरणा दिली.
✍🏻मुख्य संपादक – रोहिदास कदम
