आंबेजोगाई |मानव मित्र न्यूज प्रतिनिधी मेघा चाटे)
केज तालुक्यातील लाडेगाव येथील वेदांत साधना गुरुकुल येथे परमपूज्य स्वामी भारतानंदजी महाराज यांच्या मठावर आषाढी (देवशयनी) एकादशी निमित्त भक्तिमय वातावरणात विविध धार्मिक कार्यक्रमांचे आयोजन करण्यात आले. या सोहळ्याला परिसरातील भाविकांनी मोठ्या संख्येने उपस्थित राहून विठ्ठल नामाचा गजर करत उत्साहाने सहभाग नोंदविला.
या निमित्ताने हरिभक्त परायण ह.भ.प. उद्धवजी महाराज गोरे यांच्या सुश्राव्य कीर्तनाने उपस्थित भाविकांना भक्तिरसात तल्लीन केले. कीर्तनामधून संत परंपरा, विठ्ठल भक्ती आणि धर्माचरणाचे महत्त्व प्रभावीपणे सांगण्यात आले. कीर्तनाची सांगता हरिनामाच्या गजरात आणि टाळ-मृदुंगाच्या निनादात झाली.
कार्यक्रमादरम्यान भजन, नामस्मरण, हरिपाठ आणि इतर धार्मिक उपक्रमही पार पडले. लहानांपासून ज्येष्ठांपर्यंत सर्व भाविकांनी मोठ्या श्रद्धेने या सोहळ्यात सहभाग घेतला. संपूर्ण परिसर विठ्ठल नामाच्या जयघोषाने दुमदुमून गेला आणि आषाढी एकादशीचा उत्सव अत्यंत भक्तिमय वातावरणात साजरा झाला.
कार्यक्रमानंतर उपस्थित सर्व भाविकांना महाप्रसादाचे वाटप करण्यात आले. वेदांत साधना गुरुकुल व मठाच्या वतीने करण्यात आलेल्या नियोजनाचे भाविकांनी कौतुक केले. धार्मिक, आध्यात्मिक आणि सामाजिक एकतेचा संदेश देणारा हा सोहळा भाविकांसाठी अविस्मरणीय ठरला.
✍🏻मुख्य संपादक – रोहिदास कदम
