पुरंदर सासवड ( प्रतिनिधी अशोक कुंभार)
आषाढी एकादशीच्या पवित्र महापूजेचा मान यंदा धाराशिव जिल्ह्यातील कळंब तालुक्यातील गौरगाव येथील श्रद्धाळू माने दाम्पत्याला लाभला. या पवित्र सोहळ्यानिमित्त महाराष्ट्र राज्य मार्ग परिवहन महामंडळाने (एसटी) आपल्या परंपरेनुसार मानकरी दाम्पत्याचा विशेष सन्मान केला.
महामंडळाच्या वतीने माने दाम्पत्याला एक वर्षासाठी संपूर्ण महाराष्ट्रात एसटीने मोफत प्रवास करता येईल असा विशेष पास प्रदान करण्यात आला. आषाढी एकादशीच्या निमित्ताने महापूजेचा मान मिळालेल्या भाविकांचा गौरव करण्याची ही एसटी महामंडळाची अनेक वर्षांपासूनची जपलेली परंपरा आहे.
या उपक्रमामुळे वारकरी परंपरेचा सन्मान होत असून राज्य परिवहन महामंडळ आणि वारकरी संप्रदाय यांच्यातील भावनिक नाते अधिक दृढ होत असल्याची भावना व्यक्त करण्यात आली. यंदाही लाखो वारकऱ्यांनी विठ्ठल-रुक्मिणीच्या दर्शनासाठी पंढरपूरमध्ये हजेरी लावली असून भक्तिमय वातावरणात आषाढी एकादशी उत्सव पार पडला.
✍🏻मुख्य संपादक – रोहिदास कदम
