घनसवागी तालुका. प्रतिनिधी तिर्थपुरी राहुल बोबडे मुरमा रोड भारत डिझेल पंपावर शेतकऱ्यांची गैरसोय; मानव मित्र न्यूजच्या हस्तक्षेपामुळे मिळाले डिझेल
मुरमा रोड येथील भारत डिझेल पंपावर आज सकाळपासून शेतकऱ्यांची मोठी गर्दी पाहायला मिळाली. शेतीच्या मशागतीची अत्यंत महत्त्वाची कामे सुरू असताना अनेक शेतकरी ट्रॅक्टरसाठी डिझेल मिळविण्यासाठी तासन्तास रांगेत उभे होते. मात्र, पंप प्रशासनाकडून वेळेत डिझेल पुरवठा होत नसल्याने शेतकऱ्यांमध्ये संतापाचे वातावरण निर्माण झाले होते.
शेतकऱ्यांच्या म्हणण्यानुसार, पंपावरील मॅनेजर व काही कर्मचाऱ्यांकडून “उद्या सकाळी या” असे सांगत डिझेल देण्यास टाळाटाळ केली जात होती. त्यामुळे शेतीची महत्त्वाची कामे ठप्प झाली असून शेतकऱ्यांची मोठी गैरसोय होत होती. पावसाळ्याच्या पार्श्वभूमीवर मशागतीची कामे वेगाने सुरू असताना डिझेलअभावी अनेक ट्रॅक्टर जागेवरच उभे राहिले होते.
दरम्यान, या प्रकाराची माहिती मिळताच मानव मित्र न्यूजचे प्रतिनिधी तत्काळ घटनास्थळी दाखल झाले. त्यांनी शेतकऱ्यांच्या अडचणी जाणून घेत पंप प्रशासनाशी चर्चा केली व शेतकऱ्यांना तातडीने डिझेल उपलब्ध करून देण्यासाठी पुढाकार घेतला.
मानव मित्र न्यूज प्रतिनिधींच्या हस्तक्षेपानंतर अखेर शेतकऱ्यांना डिझेल मिळण्यास सुरुवात झाली. त्यामुळे संतप्त शेतकऱ्यांना मोठा दिलासा मिळाला. यावेळी उपस्थित शेतकऱ्यांनी मानव मित्र न्यूजचे आभार मानत, भविष्यात शेतकऱ्यांना अशा प्रकारे वेठीस धरू नये व शेतीसाठी आवश्यक इंधन वेळेत उपलब्ध करून द्यावे, अशी मागणी प्रशासनाकडे केली आहे.
✍🏻मुख्य संपादक – रोहिदास कदम
