आळंदी दि.२१ वार्ताहर श्रीसचिन शिंदे)
श्रीरामकृष्ण आध्यात्मिक वारकरी शिक्षण संस्थेतील मुलांसाठी हिंजवडी येथील एका नामांकित कंपनीच्या वतीने विविध प्रकारच्या गिफ्टचे वाटप करण्यात आले. या उपक्रमामुळे संस्थेतील मुलांच्या चेहऱ्यावर आनंद झळकला.
संबंधित कंपनीने आजपर्यंत संस्थेसाठी कलरकाम, टॉयलेट-बाथरूमची सुविधा, स्कूल बस, वर्षभर पुरेल इतके स्टेशनरी साहित्य अशी भरीव मदत केली आहे. याच उपक्रमाच्या पुढील टप्प्यात आज संस्थेतील मुलांना पियानो, बॉल, विविध गेम्स, फुटबॉल, वह्या, पेन्सिल, पेन, कलर बॅग, डबे, पाण्याच्या बाटल्या, बाहुल्या, पर्स, खेळणी गाड्या, लुडो, चेस आदी अनेक प्रकारची उपयुक्त गिफ्ट देण्यात आली.
कंपनीतील प्रतिनिधींनी मुलांसोबत हौशी खेळ खेळत त्यांचा आनंद द्विगुणित केला. यावेळी सर्व मुलांना कॅडबरी चॉकलेट व बिस्कीटचेही वाटप करण्यात आले. खेळांमध्ये विजयी ठरलेल्या मुलांना विशेष गिफ्ट देऊन त्यांचा सन्मान करण्यात आला.
यापुढील काळातही संस्थेतील मुलांसाठी आवश्यक साहित्य सातत्याने उपलब्ध करून देण्याचे आश्वासन कंपनीच्या मान्यवरांनी दिले. तसेच मुलींसाठी सहा टॉयलेट-बाथरूम बांधून देण्याचे काम कंपनीकडून करण्यात येणार असून, मुलांना संगणक शिक्षण मिळावे यासाठी दहा संगणक संस्थेला देण्यात आले आहेत.
या कार्यक्रमास ह.भ.प. मोहन महाराज शिंदे (अध्यक्ष, श्रीरामकृष्ण आध्यात्मिक वारकरी शिक्षण संस्था), रामचंद्र महाराज सारंग, रवींद्र महाराज कुमकर, सुशीला शिंदे, अशोक सालपे, पवन बागल, आकाश माळी तसेच संस्थेतील आजी-माजी विद्यार्थी उपस्थित होते.
कार्यक्रमानंतर सर्व मुलांना पंचपक्वान्न भोजन देण्यात आले. कार्यक्रमाच्या शेवटी रामचंद्र महाराज सारंग यांनी उपस्थित मान्यवरांचे व देणगीदार कंपनीचे आभार मानले.
✍🏻मुख्य संपादक – रोहिदास कदम
