तालुका धनंसावगी प्रतिनिधी राहुल बोबडे
तीर्थपुरी शहरात सध्या अवैध ऑनलाईन मटका व्यवसायाने चिंताजनक स्वरूप धारण केले असून तरुण पिढी मोठ्या प्रमाणात या जाळ्यात अडकत असल्याची धक्कादायक माहिती समोर येत आहे. व्हॉट्सअॅपच्या माध्यमातून ऑनलाईन मटका घेतला जात असून या व्यवसायात लाखो रुपयांची उलाढाल होत असल्याची चर्चा शहरात रंगली आहे.
स्थानिक नागरिकांच्या म्हणण्यानुसार, उडान कॉलनी परिसरात काही टोळ्या संघटित पद्धतीने हा अवैध व्यवसाय चालवत आहेत. हैदराबाद, बंगळुरू, कर्नाटकसह विविध राज्यांतील लोकांकडून ऑनलाईन पैशांची देवाणघेवाण होत असल्याचे सांगितले जात आहे. विशेष म्हणजे अल्पवयीन आणि तरुण मुलं मोठ्या प्रमाणात या धंद्याकडे आकर्षित होत आहेत.
“शिक्षण घेऊन नोकरीत दहा हजार रुपये मिळवण्यापेक्षा ऑनलाईन मटक्यातून रोज दहा हजार रुपये कमावतो,” अशी मानसिकता काही तरुणांमध्ये वाढत असल्याची खंत नागरिकांनी व्यक्त केली. त्यामुळे शिक्षणापासून दूर जात असलेली तरुणाई व्यसन, गुंडागर्दी आणि अवैध मार्गांकडे वळत असल्याचे चित्र निर्माण झाले आहे.
स्थानिकांमध्ये अशीही चर्चा आहे की, काही युवकांकडे बेकायदेशीर हत्यारे आणि रिव्हॉल्व्हर आढळत असून शहरातील वातावरण भीतीदायक बनत चालले आहे. नागरिकांनी पोलिस प्रशासनाने तातडीने कठोर कारवाई करून विशेष पथक नेमावे, अशी मागणी केली आहे.
जिल्हा पोलिस अधीक्षकांनी या गंभीर प्रकाराकडे लक्ष देत ऑनलाईन मटका रॅकेटवर मोठी मोहीम राबवावी, संबंधितांवर कठोर गुन्हे दाखल करावेत आणि तरुण पिढीला व्यसनाच्या गर्तेतून बाहेर काढण्यासाठी जनजागृती मोहीम सुरू करावी, अशी अपेक्षा तीर्थपुरीकर व्यक्त करीत आहेत.
✍🏻मुख्य संपादक – रोहिदास कदम
