प्रतिनिधी : अशोक कुंभार,)
चाकण परिसरात वाहन खरेदी-विक्रीच्या व्यवहारातून बनावट नोटा देऊन फसवणूक करणाऱ्या टोळीचा चाकण पोलिसांनी पर्दाफाश केला आहे. या कारवाईत तब्बल ₹42 लाख 50 हजारांच्या बनावट नोटा जप्त करण्यात आल्या असून दोन आरोपींना अटक करण्यात आली आहे.
मिळालेल्या माहितीनुसार, बारामती येथील फिर्यादी कार विक्रीसाठी चाकण परिसरात आले होते. आरोपींनी मोबाईलद्वारे संपर्क साधत गाडी खरेदीची तयारी दर्शवली. दोन्ही बाजूंमध्ये ₹60 लाखांमध्ये व्यवहार निश्चित झाला.
व्यवहारानंतर आरोपींनी फिर्यादीला ₹3 लाख रोख रक्कम देऊन गाडी घेऊन पसार झाले. मात्र दिलेल्या पैशांची तपासणी केली असता वर-खाली खऱ्या नोटा आणि मध्ये पूर्णपणे बनावट नोटा असल्याचा धक्कादायक प्रकार समोर आला.
फसवणूक झाल्याचे लक्षात येताच फिर्यादीने तात्काळ पोलिसांत तक्रार दाखल केली. घटनेचे गांभीर्य लक्षात घेऊन चाकण पोलिसांनी तातडीने तपास सुरू केला. अवघ्या काही तासांत तांत्रिक तपासाच्या आधारे आरोपींना अटक करण्यात आली.
अटक करण्यात आलेल्या आरोपींची नावे पुढीलप्रमाणे :
गणेश ज्ञानदेव ठाकरे
समीर दिनकर महल्ले
आरोपींकडून ₹42.50 लाखांच्या बनावट नोटा, फसवणुकीत वापरलेली अल्टो कार, एक मोटारसायकल आणि इतर साहित्य जप्त करण्यात आले आहे.
चाकणमध्ये पुन्हा एकदा बनावट नोटांच्या रॅकेटचा पर्दाफाश झाल्याने परिसरात खळबळ उडाली असून पोलिसांनी वेळीच कारवाई केल्यामुळे मोठा आर्थिक गुन्हा उघडकीस आला आहे.
✍🏻मुख्य संपादक – रोहिदास कदम
