( प्रतिनिधी अशोक कुंभार)
हरगुडे (ता. पुरंदर, जि. पुणे) : हरगुडे गावात आखाडी-बेंदूर उत्सव सोमवारी, दि. २७ जुलै २०२६ रोजी ग्रामस्थांच्या उत्स्फूर्त सहभागातून मोठ्या उत्साहात साजरा करण्यात आला.
पूर्वी शेतीची प्रमुख ताकद असलेल्या बैलांचे पूजन करून बेंदूर साजरा करण्याची परंपरा आजही जपली जात असली, तरी आधुनिक शेती पद्धतीमुळे आणि यांत्रिकीकरणामुळे गावात बैलांची संख्या लक्षणीयरीत्या कमी झाली आहे. त्यामुळे यंदा पारंपरिक बैलांच्या मिरवणुकीऐवजी आकर्षक सजावट केलेल्या ट्रॅक्टरची भव्य मिरवणूक काढण्यात आली. फुलांची सजावट, भगवे ध्वज आणि पारंपरिक वाद्यांच्या गजरात निघालेल्या या मिरवणुकीने ग्रामस्थांचे लक्ष वेधून घेतले.
गावातील शेतकरी, महिला, युवक आणि ज्येष्ठ नागरिक मोठ्या संख्येने या सोहळ्यात सहभागी झाले होते. आधुनिकतेची कास धरतानाच ग्रामीण संस्कृती आणि परंपरा जपण्याचा संदेश या आगळ्यावेगळ्या बेंदूर उत्सवातून देण्यात आला. उत्साहपूर्ण आणि भक्तिमय वातावरणात हा सोहळा संपन्न झाला.
✍🏻मुख्य संपादक – रोहिदास कदम
