पांगारे (ता. पुरंदर, जि. पुणे) | प्रतिनिधी अशोक कुंभार
दि. १२ जुलै २०२६ (रविवार) रोजी श्री सोपानकाका पालखी सोहळ्यानिमित्त पांगारे गावात भक्तिमय वातावरणात दिंडीचे आगमन झाले. परळी वैजनाथ पालखीच्या मागोमाग येणाऱ्या दिंडी क्रमांक १८ चे गावकऱ्यांनी उत्साहात स्वागत केले.
पांगारे येथील कुंभारवाडा परिसरात दिंडीचा मुक्काम झाला. मुक्कामादरम्यान वारकरी संप्रदायाच्या परंपरेनुसार फुगड्या, हरिनाम भजन, अभंग गायन तसेच आध्यात्मिक कार्यक्रमांचे आयोजन करण्यात आले. वारकरी भाविकांनी विठ्ठलनामाच्या अखंड गजरात भक्तीचा आनंद लुटला.
यावेळी दिंडीचे चालक व मालक अण्णासाहेब विष्णुदास गित्ते यांनी वारकरी संप्रदायाची परंपरा, वारीचे महत्त्व आणि समाजात भक्ती, सेवा व एकतेचा संदेश याविषयी आपले मनोगत व्यक्त केले. उपस्थित वारकरी व ग्रामस्थांनी त्यांच्या विचारांना उत्स्फूर्त प्रतिसाद दिला.
या दिंडीचे नाव विष्णु अण्णासाहेब गित्ते दिंडी असून दिंडीतील विविध जबाबदाऱ्या पुढीलप्रमाणे पार पाडण्यात आल्या:
दिंडी चालक व मालक – अण्णासाहेब विष्णुदास गित्ते
तुळशी वाहक – शोभाताई महादेव गित्ते
चोपदार – सुभाष कराड
हंडेवाली – मीरा कराड
वीणेकरी – रामराव मुंडे
पताका – पांडुरंग मुंडे
भजनी – अशोक मुंडे
याशिवाय विष्णु अण्णा गित्ते, मेघा महादेव चाटे, अनिल गुजराथी, त्रिशोक भोसले, बबलू भोसले, नाथराव गित्ते, गोविंद मुंडे आणि गंगाधर गित्ते यांच्यासह अनेक वारकरी आणि ग्रामस्थांनी या सोहळ्यात सक्रिय सहभाग घेतला.
भक्तिरसाने नटलेल्या या मुक्कामामुळे संपूर्ण पांगारे गाव विठ्ठलनामाच्या गजराने दुमदुमून गेले. वारकरी परंपरेतील एकात्मता, शिस्त आणि सेवाभावाचे दर्शन घडवत हा पालखी सोहळा अत्यंत आनंदी व उत्साहपूर्ण वातावरणात संपन्न झाला.
✍🏻मुख्य संपादक – रोहिदास कदम
