सासवड (प्रतिनिधी अशोक कुंभार)
आळंदी येथे सोमवारी दुपारी देहू-आळंदी मार्गावरील PMPML बसस्थानकावर दुर्दैवी घटना घडली. बसमधून उतरत असताना एका प्रवाशाचा तोल जाऊन तो थेट PMPML बसच्या मागील चाकाखाली पडल्याने त्यांचा जागीच मृत्यू झाल्याची धक्कादायक माहिती समोर आली आहे.
घटनेनंतर बसस्थानक परिसरात मोठी गर्दी झाली होती. स्थानिक नागरिक, भाविक आणि प्रवाशांनी या घटनेबद्दल तीव्र संताप व्यक्त करत विद्यमान बसस्थानकाच्या सुरक्षिततेवर गंभीर प्रश्न उपस्थित केले आहेत.
नागरिकांच्या म्हणण्यानुसार, आळंदीतील सध्याचे बसस्थानक अरुंद आणि गर्दीचे झाले असून, भाविकांची मोठी वर्दळ असल्याने अपघाताचा धोका वाढत आहे. त्यामुळे बसस्थानक तत्काळ नदीपलीकडे हलविण्याची मागणी जोर धरत आहे. नदीपलीकडे PMPML साठी प्रशस्त जागा उपलब्ध असून, “पाच मिनिटे पायी चालावे लागले तरी चालेल, पण नागरिक आणि भाविकांची सुरक्षा महत्त्वाची,” अशी भूमिका नागरिकांनी मांडली आहे.
तसेच आळंदी नगरपरिषद, पोलिस प्रशासन आणि PMPML प्रशासनाने या घटनेचा सविस्तर अहवाल जाहीर करून भविष्यात अशा दुर्घटना टाळण्यासाठी तातडीने ठोस उपाययोजना कराव्यात, अशी मागणी करण्यात येत आहे.
✍🏻मुख्य संपादक – रोहिदास कदम
