,,(मुंबई प्रतिनिधी बबनराव मोहिते )महाराष्ट्र मेडिकल कौन्सिल निवडणूक २०२६ साठी येत्या रविवारी (दि. २६ एप्रिल) मतदान प्रक्रिया पार पडणार असून, यावेळी भारतीय जनता पार्टी ने पहिल्यांदाच अधिकृत पॅनल जाहीर करत ही निवडणूक प्रतिष्ठेची केली आहे.
या निवडणुकीसाठी मुख्यमंत्री देवेंद्र फडणवीस, प्रदेशाध्यक्ष रविंद्र चव्हाण, मंत्री पंकजा मुंडे तसेच माजी खासदार प्रीतम मुंडे यांच्यासह अनेक नेत्यांच्या मार्गदर्शनाखाली भाजप मैदानात उतरली आहे.
गेल्या २५ ते ३० वर्षांपासून कौन्सिलवर काही ठराविक गटांचे वर्चस्व असल्याचा आरोप करत, सर्वसामान्य रुग्णांचे हित आणि लहान रुग्णालयांचे अस्तित्व धोक्यात आल्याचे भाजपकडून सांगण्यात आले. कॉर्पोरेट हॉस्पिटलच्या वाढत्या जाळ्याला आळा घालण्यासाठी आणि राज्यातील डॉक्टरांना न्याय मिळवून देण्यासाठी ही निवडणूक जिंकण्याचा निर्धार पक्षाने व्यक्त केला आहे.
भाजपने आपल्या कार्यकर्त्यांना आवाहन करत, ओळखीतील डॉक्टर मतदारांना संपर्क साधून अनुक्रमांक १, १३, २४, २७, २९, ४०, ४३, ४८, ५६ या क्रमांकावरील उमेदवारांना मतदान करण्याचे आवाहन केले आहे.
📍 बीड जिल्ह्यातील मतदान
बीड जिल्हा रुग्णालय प्रशिक्षण केंद्र येथे सकाळी ८ ते सायंकाळी ५ या वेळेत मतदान होणार आहे.
ही माहिती भाजपा वैद्यकीय आघाडी जिल्हाध्यक्ष डॉ. वासुदेव नेहरकर, डॉ. अमोल गीते आणि डॉ. लक्ष्मण जाधव यांनी दिली.
✍🏻मुख्य संपादक – रोहिदास कदम
