डॉ. मुग्धा कर्णिक यांच्या वक्तव्याचा थोरल्या पादुका देवस्थानकडून तीव्र निषेध
वारकरी संप्रदायाच्या भावना दुखावल्याचा आरोप; कायदेशीर कारवाईची मागणी
पुरंदर सासवड (प्रतिनिधी : अशोक कुंभार) : डॉ. मुग्धा कर्णिक यांनी पुण्यात आयोजित महाराष्ट्र नास्तिक मेळाव्यात संत परंपरा, पंढरीचे श्री विठ्ठल, तसेच संत ज्ञानेश्वर महाराज आणि संत तुकाराम महाराज यांच्याबाबत विडंबनात्मक स्वरूपात केलेल्या वक्तव्याचा श्री संत ज्ञानेश्वर महाराज थोरल्या पादुका देवस्थान ट्रस्टतर्फे तीव्र निषेध करण्यात आला आहे.
देवस्थान ट्रस्टचे संस्थापक अध्यक्ष ॲड. विष्णू तापकीर यांनी प्रसिद्धीपत्रकाद्वारे सांगितले की, डॉ. कर्णिक यांनी धर्म, पंथ आणि संस्कृती संदर्भात आक्षेपार्ह व बेताल वक्तव्य केले आहे. महाराष्ट्राचे लोकदैवत असलेल्या श्री विठ्ठल आणि वारकरी वारी परंपरा कालबाह्य असल्याचे विधान करून त्यांनी राज्यातील लाखो वारकऱ्यांच्या भावना दुखावल्या आहेत.
ॲड. तापकीर यांनी पुढे म्हटले की, संत परंपरेचा पुरेसा अभ्यास न करता अशा प्रकारची वक्तव्ये करून काहीजण सवंग प्रसिद्धी मिळवण्याचा प्रयत्न करतात. अशा वक्तव्यांमुळे समाजात आणि वारकरी संप्रदायात असंतोष निर्माण होण्याची शक्यता आहे.
या प्रकरणी शासनाने डॉ. मुग्धा कर्णिक यांच्यावर कठोर कायदेशीर कारवाई करावी, तसेच त्यांनी वारकरी संप्रदायाची जाहीर माफी मागावी, अशी मागणीही ॲड. तापकीर यांनी केली आहे.
✍🏻मुख्य संपादक – रोहिदास कदम
. मुग्धा कर्णिक यांच्या वक्तव्याचा थोरल्या पादुका देवस्थानकडून तीव्र निषेध