पुरंदर सासवड (प्रतिनिधी अशोक कुंभार) सातारा एसटी विभागात मोठी कारवाई ; तीन वरिष्ठ अधिकारी निलंबित
महाराष्ट्र राज्य मार्ग परिवहन महामंडळ च्या सातारा विभागात मोठी प्रशासकीय कारवाई करण्यात आली असून कर्तव्यात हलगर्जीपणा आणि कसूर केल्याचा ठपका ठेवत तीन वरिष्ठ अधिकाऱ्यांना निलंबित करण्यात आले आहे. या निर्णयामुळे संपूर्ण एसटी विभागात खळबळ उडाली आहे.
निलंबित करण्यात आलेल्या अधिकाऱ्यांमध्ये विभागीय यंत्र अभियंता विकास माने, विभागीय सुरक्षा अधिकारी शेखर फरांदे आणि विभागीय भांडार अधिकारी सचिन गायकवाड यांचा समावेश आहे.
मिळालेल्या माहितीनुसार, विरेंद्र कदम यांनी ८ आणि ९ मे रोजी सातारा जिल्ह्यातील शिरवळ आणि पाटण आगारांना अचानक भेट दिली होती. या तपासणीदरम्यान आगारातील कामकाजात अनेक त्रुटी आणि आक्षेपार्ह बाबी निदर्शनास आल्या. त्याचा सविस्तर अहवाल कार्यकारी व्यवस्थापनाकडे पाठविण्यात आला होता.
तपासणीदरम्यान दोन्ही आगारातून अवैध प्रवासी वाहतूक सुरू असल्याचे समोर आले. या गंभीर प्रकाराकडे दुर्लक्ष केल्याप्रकरणी विभागीय सुरक्षा अधिकारी शेखर फरांदे यांच्यावर निलंबनाची कारवाई करण्यात आली. तसेच अचानक भेटीच्या वेळी विभागीय यंत्र अभियंता विकास माने आणि भांडार अधिकारी सचिन गायकवाड हे अनुपस्थित आढळल्याने त्यांच्यावरही कर्तव्यात कसूर केल्याचा ठपका ठेवण्यात आला.
या घटनेमुळे सातारा एसटी विभागातील कारभारावर प्रश्नचिन्ह उपस्थित झाले असून पुढील काळात आणखी काही अधिकाऱ्यांवर कारवाई होण्याची शक्यता व्यक्त केली जात आहे. प्रवाशांच्या सुरक्षेसह प्रशासनातील शिस्त राखण्यासाठी ही कारवाई करण्यात आल्याचे सांगितले जात आहे.
✍🏻मुख्य संपादक – रोहिदास कदम
