जमीन फसवणूक प्रकरणात मुलगा-सूनवर आरोप; त्रस्त वृद्ध दाम्पत्याची न्यायासाठी धडपड
बातमी सासवड प्रतिनिधी अशोक कुंभार)
पुरंदर तालुक्यातील मौजे वनपूरी (शेरीचा मळा) येथे एक धक्कादायक जमीन फसवणुकीचा प्रकार समोर आला आहे. वृद्ध दाम्पत्य सौ. मालन मारुती कुंभारकर आणि मारुती सोपान कुंभारकर यांनी स्वतःच्या मुलगा, सून व नातवंडांविरोधात गंभीर आरोप करत विविध शासकीय विभागांकडे लेखी तक्रार दाखल केली आहे.
तक्रारीनुसार, मुलगा चंद्रकांत सोपान कुंभारकर, सून सत्यभामा चंद्रकांत कुंभारकर आणि दोन नातवंडांनी शौचालय बांधण्यास संमती घेण्याच्या बहाण्याने वृद्ध दाम्पत्याला सासवड येथे नेले. त्यानंतर सर्व शेतजमीन बक्षीसपत्राद्वारे स्वतःच्या नावावर करून घेत फसवणूक केल्याचा आरोप करण्यात आला आहे.
या प्रकरणी मारुती कुंभारकर यांनी महसूल व पोलीस प्रशासनाकडे वारंवार तक्रारी अर्ज दिले, मात्र न्याय मिळाला नसल्याने अखेर न्यायालयात दावा दाखल करण्यात आला आहे. मात्र, न्यायालयात तारखेला हजर राहू नये यासाठी मुलगा-सून व नातवंडांकडून दबाव आणला जात असल्याचा गंभीर आरोपही करण्यात आला आहे.
वृद्ध महिला सौ. मालन कुंभारकर यांनी राज्य महिला आयोग, मानवी हक्क आयोग, जिल्हाधिकारी पुणे, ग्रामीण पोलीस अधीक्षक तसेच सासवड पोलीस स्टेशन येथे तक्रार अर्ज सादर करून न्यायाची मागणी केली आहे.
तक्रारीत त्यांनी नमूद केले आहे की, “संपूर्ण जमीन फसवणुकीने घेतल्यामुळे आमच्या उदरनिर्वाहाचा प्रश्न निर्माण झाला आहे. या वयात आम्हाला शिवीगाळ, मारहाण व दमदाटी सहन करावी लागत आहे. न्यायालयावर आमचा विश्वास आहे; मात्र आम्हाला न्याय मिळाला नाही, तर आत्महत्या करण्याची परवानगी द्यावी,” अशी भावनिक मागणी त्यांनी केली आहे.
या प्रकरणामुळे परिसरात खळबळ उडाली असून, संबंधित प्रशासनाने तातडीने लक्ष घालून न्याय द्यावा, अशी मागणी होत आहे.
✍🏻मुख्य संपादक – रोहिदास कदम
