,(सासवड प्रतिनिधी अशोक कुंभार )
लोणी-काळभोर (पुणे) : पुणे शहराची जीवनवाहिनी असलेल्या मुळा-मुठा नदीपात्रात कुठलीही प्रक्रिया न करता अवैधरित्या टाकण्यात येणारा कचरा त्वरित बंद करण्याच्या मागणीसाठी एमआयटी आर्ट, डिझाईन अँड टेक्नॉलॉजी विद्यापीठातील विद्यार्थ्यांनी सुरू केलेले ‘कचरा बंद’ आंदोलन पोलिसांच्या मध्यस्थीनंतर सात दिवसांसाठी तात्पुरते स्थगित करण्यात आले आहे.
पोलिस उपायुक्त डॉ. राजकुमार शिंदे व सहाय्यक पोलिस आयुक्त अनुराधा उदमले यांनी आंदोलनस्थळी भेट देऊन परिस्थितीची गंभीरता लक्षात घेत मध्यस्थी केली. त्यानंतर विद्यार्थ्यांनी लोणी-काळभोर व कदमवाकवस्ती ग्रामपंचायतींना कचरा प्रकल्प उभारण्यासाठी सात दिवसांची मुदत दिली आहे.
विद्यार्थ्यांनी स्पष्ट इशारा देत सांगितले की, सात दिवसांत नदीपात्रात थेट कचरा टाकणे बंद न झाल्यास दोन्ही ग्रामपंचायतींच्या कचऱ्याच्या गाड्यांना विद्यापीठातून प्रवेश दिला जाणार नाही.
या आंदोलनात एमआयटी विश्वशांती गुरुकुल, एमआयटी ज्युनिअर कॉलेज आणि एमआयटी एडीटी विद्यापीठातील हजारो विद्यार्थी व निवासी कर्मचारी सहभागी झाले होते. विद्यार्थ्यांनी नदी प्रदूषण, पर्यावरणाचा ऱ्हास आणि प्रशासनाच्या दुर्लक्षाविरोधात जोरदार घोषणाबाजी केली.
दरम्यान, २६ फेब्रुवारी २०२६ रोजी नदीपात्रातील कचऱ्याला लागलेल्या भीषण आगीत चार दिवस धूर पसरला होता. त्यामुळे परिसरात विषारी धूर निर्माण होऊन काही विद्यार्थ्यांना श्वसनाचा त्रास झाल्याने रुग्णालयात दाखल करावे लागले होते. यानंतर विद्यार्थ्यांनी पुढाकार घेत ‘कचरा बंद’ आंदोलन सुरू केले होते.
✍🏻मुख्य संपादक – रोहिदास कदम
