पुणे प्रतिनिधी अशोक कुंभार)
पुणे आणि पिंपरी-चिंचवड परिसरात विषारी स्पिरिटयुक्त दारू प्राशन केल्याने तब्बल १३ जणांचा मृत्यू झाल्याची धक्कादायक घटना समोर आली आहे. अनेक नागरिकांची प्रकृती गंभीर असून काहींवर रुग्णालयात उपचार सुरू आहेत. या घटनेमुळे संपूर्ण राज्यात संतापाची लाट उसळली आहे.
पिंपरी-चिंचवडमधील दापोडी आणि फुगेवाडी परिसरात सर्वाधिक बळी गेले असून, पुण्यातील हडपसर आणि काळेपडळ भागातही मृत्यूंची नोंद झाली आहे. पोलिस तपासात ही विषारी दारू सराईत आरोपी योगेश वानखेडे याने तयार केल्याचे उघड झाले आहे. संबंधित दारू विविध भागांत विक्रीसाठी पुरवण्यात आली होती.
या प्रकरणात राज्याचे मुख्यमंत्री Devendra Fadnavis यांनी कठोर भूमिका घेत पोलिसांना संपूर्ण रॅकेट उद्ध्वस्त करण्याचे आदेश दिले आहेत. “ही केवळ घटना नसून एक प्रकारे हत्या आहे. दोषींवर अतिशय कडक कारवाई केली जाईल,” असा इशारा त्यांनी दिला.
प्रकरणी पोलिसांनी आतापर्यंत आठ जणांना अटक केली असून आणखी आरोपींचा शोध सुरू आहे. फुगेवाडी परिसरात स्थानिक नागरिक आणि महिलांनी संताप व्यक्त करत आंदोलनाची भूमिका घेतली आहे. परिसरात मोठा पोलीस बंदोबस्त तैनात करण्यात आला आहे. �
✍🏻मुख्य संपादक – रोहिदास कदम
