- 📍 ,पुरंदर (प्रतिनिधी अशोक कुंभार)
पुरंदर तालुक्यातील दिवे गावच्या जाधववाडी येथील सुपुत्र तथा भारतीय सैन्यात कार्यरत जवान घनश्याम रायबा अडागळे (वय २७ वर्षे) यांचे हिमाचल प्रदेशात कर्तव्य बजावत असताना दुर्दैवी निधन झाले. या घटनेने संपूर्ण परिसरात हळहळ व्यक्त होत असून गावावर शोककळा पसरली आहे.
मिळालेल्या माहितीनुसार, देशसेवेच्या कर्तव्यात तत्पर असताना अचानक घडलेल्या अपघातात त्यांचा मृत्यू झाला. देशासाठी प्राण अर्पण करणाऱ्या या तरुण जवानाच्या अकाली जाण्याने कुटुंबीयांसह गावकऱ्यांवर दुःखाचा डोंगर कोसळला आहे.
घनश्याम अडागळे हे काही महिन्यांपूर्वीच सुट्टी संपवून पुन्हा सेवेत रुजू झाले होते. शांत, मनमिळाऊ आणि नम्र स्वभावामुळे ते गावातील सर्वांच्या परिचयाचे व आवडते होते. त्यांच्या वागणुकीमुळे त्यांनी अल्पावधीतच गावकऱ्यांच्या मनात विशेष स्थान निर्माण केले होते.
त्यांच्या पश्चात आई-वडील, भाऊ असा परिवार असून त्यांच्या निधनाची बातमी समजताच गावकऱ्यांनी मोठ्या संख्येने त्यांच्या घरी धाव घेत कुटुंबीयांचे सांत्वन केले.
दरम्यान, आज (दि. २९) शासकीय इतमामात त्यांच्या पार्थिवावर अंत्यसंस्कार करण्यात येणार असून, अंतिम निरोप देण्यासाठी परिसरातील नागरिक मोठ्या संख्येने उपस्थित राहणार आहेत.🙏 देशासाठी आयुष्य अर्पण करणाऱ्या या वीर जवानाला संपूर्ण पुरंदर तालुक्याची भावपूर्ण श्रद्धांजली…
✍🏻मुख्य संपादक – रोहिदास कदम
