पुणे / प्रतिनिधी सचिन शिंदे : पुणे जिल्ह्यातील भोर तालुक्यात अवकाळी पावसासह झालेल्या विजांच्या कडकडाटात दुर्दैवी घटना घडली असून एका युवकाचा मृत्यू झाला आहे. तर या दुर्घटनेत अन्य तिघेजण जखमी झाल्याची माहिती समोर आली आहे. ही घटना वडगाव-दळ परिसरात घडल्याने संपूर्ण भागात हळहळ व्यक्त होत आहे.
मिळालेल्या माहितीनुसार, परिसरात अचानक जोरदार पाऊस आणि विजांचा कडकडाट सुरू झाला. त्यावेळी काही युवक रस्त्यालगत थांबले असताना अचानक वीज कोसळली. या घटनेत एका युवकाचा जागीच मृत्यू झाला, तर अन्य तिघे गंभीर जखमी झाले. स्थानिक नागरिकांनी तत्काळ मदतकार्य करत जखमींना जवळच्या रुग्णालयात दाखल केले
घटनेची माहिती मिळताच पोलीस व स्थानिक प्रशासन घटनास्थळी दाखल झाले. पंचनामा करून पुढील तपास सुरू करण्यात आला आहे. या दुर्दैवी घटनेमुळे भोर तालुक्यावर शोककळा पसरली असून नागरिकांमध्ये भीतीचे वातावरण निर्माण झाले आहे
दरम्यान, हवामान विभागाने पुढील काही दिवस विजांच्या कडकडाटासह पावसाचा इशारा दिला असून नागरिकांनी सुरक्षित ठिकाणी राहण्याचे आवाहन प्रशासनाकडून करण्यात आले आहे
✍🏻मुख्य संपादक – रोहिदास कदम
