आळंदी (प्रतिनिधी.रवि कदम ) – आगामी आळंदी नगरपरिषद सार्वत्रिक निवडणूक 2025 पारदर्शक व शांततेत पार पडावी यासाठी आज दिनांक 7 नोव्हेंबर 2025 रोजी आळंदी नगरपरिषदेत निवडणुकीसंदर्भात मार्गदर्शन बैठक आयोजित करण्यात आली.
या बैठकीस निवडणूक निर्णय अधिकारी श्री. जयराज देशमुख, मुख्याधिकारी खांडेकर साहेब, आळंदी पोलीस स्टेशनचे निरीक्षक श्री भीमराव.नरके, दिघी पोलीस स्टेशनचे निरीक्षक प्रमोद वाघ, तसेच वाहतूक पोलीस निरीक्षक चव्हाण उपस्थित होते. या अधिकाऱ्यांनी उपस्थित उमेदवार, नगराध्यक्ष पदाचे इच्छुक तसेच नागरिकांना आदर्श आचारसंहितेचे नियम, फॉर्म भरण्याची प्रक्रिया व प्रचाराच्या मर्यादा याबाबत सविस्तर मार्गदर्शन केले.
नरके साहेब यांनी सांगितले की, उमेदवार व कार्यकर्त्यांकडे परवानाधारक शस्त्र असल्यास ती निवडणुकीच्या कालावधीत संबंधित पोलीस ठाण्यात जमा करावी. प्रचार सकाळी 9 ते संध्याकाळी 10 वाजेपर्यंत करण्यास परवानगी आहे. मतदान केंद्रापासून 100 फुटाच्या अंतरावर केवळ 10×10 फूट आकाराचा मंडप ठेवता येईल, आणि त्यात फक्त चार कार्यकर्ते उपस्थित राहू शकतील.
निवडणुकीदरम्यान बाहेरगावहून येणारे नातेवाईक किंवा मित्रमंडळी मतदान केंद्राजवळ आढळल्यास त्यांच्यावर कारवाई केली जाईल, असेही त्यांनी स्पष्ट केले. मिरवणुकीच्या वेळी दोन पक्षांचे जथ्थे एकमेकांसमोर येणार नाहीत याची दक्षता घ्यावी, तसेच बॅनर, पोस्टर यासाठी नगरपरिषदेची परवानगी घेणे आवश्यक असल्याचे सांगण्यात आले.
सभांसाठी धर्मशाळा किंवा खुले मैदान यांसारखी ठिकाणे वापरावीत; चौक, ट्रॅफिक पॉइंट येथे सभा घेण्यास बंदी राहील. नगराध्यक्ष उमेदवाराला दहा वाहनांची परवानगी असून खर्च मर्यादा सात लाख रुपये, तर नगरसेवक उमेदवाराला दोन लाख रुपये इतकी आहे. रोजचा खर्च नोंदवणे बंधनकारक राहील, व 50,000 रुपयांहून अधिक रक्कम सापडल्यास संबंधितांना व्यक्ती चौकशी केली जाईल.
निवडणूक प्रक्रिया ऑनलाईन पद्धतीने पार पडणार असून उमेदवारांना संबंधित लिंक पाठवण्यात येईल. फॉर्म दाखल करताना पाच जणांपर्यंतच संगत ठेवता येईल. शक्ती प्रदर्शनाची मर्यादा 200 फूट लांब असावे.
अर्ज दाखल करण्याची सुरुवात – 10 नोव्हेंबर,
अंतिम तारीख – 17 नोव्हेंबर (सायं 3 वाजेपर्यंत),
अर्ज छाननी – 18 नोव्हेंबर,
अर्ज मागे घेण्याची अंतिम तारीख – 25 नोव्हेंबर,
मतदान – 2 डिसेंबर,
मतमोजणी – 3 डिसेंबर अशी निवडणूक कार्यक्रमाची रूपरेषा जाहीर करण्यात आली.
नगराध्यक्ष उमेदवारांना डिपॉझिट स्वरूपात ₹1000, तर नगरसेवक उमेदवारांना ₹500 इतकी ठेव रक्कम जमा करावी लागणार आहे. निवडणूक आयोगाने सर्व उमेदवारांना आदर्श आचारसंहिता पाळत शांततेत आणि प्रामाणिकपणे निवडणूक लढवावी असे आवाहन केले.
अधिकाऱ्यांनी शेवटी सांगितले की, उमेदवारांच्या जात पडताळणी प्रक्रियेसाठी प्रशासन पूर्ण सहकार्य करेल.
✍🏻मुख्य संपादक – रोहिदास कदम
