पुणे सासवड| प्रतिनिधी अशोक कुंभार
जागतिक पर्यावरण दिनानिमित्त कारागृह विभाग आणि रोटरी क्लब ऑफ पुणे टिळक रोड यांच्या संयुक्त विद्यमाने येरवडा कारागृह परिसरात ११ हजार वृक्षांची लागवड करून घनदाट नागरी वन (डेन्स अर्बन फॉरेस्ट) निर्माण करण्याच्या महत्त्वाकांक्षी उपक्रमाला प्रारंभ करण्यात आला.
या उपक्रमाच्या उद्घाटनप्रसंगी कारागृह विभागाचे अतिरिक्त पोलीस महासंचालक डॉ. सुहास वारके (आयपीएस), म्युनिशन्स इंडिया लिमिटेडचे मानव संसाधन संचालक नंदकिशोर नाईक, रोटरी प्रांत ३१३१ चे प्रांतपाल संतोष मराठे, रोटरी क्लब ऑफ पुणे टिळक रोडचे अध्यक्ष देवदत्त हंबर्डीकर, कारागृह प्रशासनाचे अधिकारी शामकांत शेडगे, रोटरी डिस्ट्रिक्ट ३१३१ चे पर्यावरण संचालक राजेंद्रकुमार सराफ तसेच विविध मान्यवर उपस्थित होते.
वाढते शहरीकरण, प्रदूषण आणि हवामान बदलाच्या पार्श्वभूमीवर पर्यावरण संवर्धनासाठी हा उपक्रम राबविण्यात येत आहे. येरवडा खुल्या कारागृहाच्या परिसरातील सुमारे एक एकर जागेवर घनदाट नागरी वन विकसित करण्यात येणार असून, यामुळे शहरातील हरित क्षेत्रात मोठी भर पडणार आहे.
घनदाट नागरी वनामुळे हवेची गुणवत्ता सुधारण्यास, कार्बन शोषण क्षमता वाढविण्यास, जैवविविधतेचे संवर्धन करण्यास आणि पर्यावरणीय संतुलन राखण्यास मदत होणार आहे. पर्यावरण संरक्षणाच्या दिशेने हा उपक्रम महत्त्वपूर्ण पाऊल मानला जात असून, लागवड केलेल्या प्रत्येक वृक्षाचे संगोपन आणि संवर्धन करण्याची जबाबदारी कारागृह प्रशासनाने स्वीकारली आहे.
या प्रकल्पामुळे भविष्यात येरवडा कारागृह परिसर समृद्ध हरित पट्टा म्हणून विकसित होऊन पर्यावरण संवर्धनाचा आदर्श निर्माण करेल, असा विश्वास उपस्थित मान्यवरांनी व्यक्त केला. 🌱🌳
– मानव मित्र न्यूज. 
✍🏻मुख्य संपादक – रोहिदास कदम
