अकोला | प्रतिनिधी
अकोला जिल्ह्यातील अंजी मिझापूर येथे गॅस सिलेंडर घेण्यासाठी रांगेत उभ्या असलेल्या माजी सरपंचांचा अचानक मृत्यू झाल्याची धक्कादायक घटना घडली आहे. या घटनेमुळे परिसरात हळहळ व्यक्त केली जात असून नागरिकांमध्ये संतापाची लाट पसरली आहे.
मिळालेल्या माहितीनुसार, अंजी मिझापूर येथील माजी सरपंच शंकरराव शिरसाट हे यदुराज गॅस एजन्सी येथे सिलेंडर क्रमांक लावण्यासाठी रांगेत उभे होते. यावेळी त्यांना अचानक चक्कर आली आणि ते खाली कोसळले. उपस्थित नागरिकांनी तत्काळ त्यांना मदत करण्याचा प्रयत्न केला, मात्र त्यांचा जागीच मृत्यू झाल्याचे समोर आले.
या घटनेमुळे गॅस वितरण व्यवस्थेवर प्रश्नचिन्ह उपस्थित करण्यात येत असून, नागरिकांनी प्रशासनाकडून योग्य नियोजन करण्याची मागणी केली आहे. विशेषतः वृद्ध नागरिकांसाठी स्वतंत्र व्यवस्था करावी, अशी मागणी स्थानिकांनी केली आहे.
दरम्यान, या घटनेनंतर परिसरात शोककळा पसरली असून नागरिकांकडून माजी सरपंच शंकरराव शिरसाट यांना श्रद्धांजली वाहण्यात येत आहे.
✍🏻मुख्य संपादक – रोहिदास कदम
