पुणे प्रतिनिधी रोहिदास कदम
पुणे: कृत्रिम बुद्धिमत्ता (AI) क्षेत्रातील वाढत्या संधी लक्षात घेऊन एमआयटी आर्ट, डिझाईन अँड टेक्नॉलॉजी (MIT-ADT) विद्यापीठाने ‘स्कूल ऑफ आर्टिफिशियल इंटेलिजन्स’ स्थापनेची घोषणा केली आहे. या माध्यमातून विद्यार्थ्यांना उद्योगाभिमुख आणि अत्याधुनिक तंत्रज्ञानावर आधारित शिक्षण देण्याचा विद्यापीठाचा मानस आहे.
या स्कूलअंतर्गत बी.टेक (आर्टिफिशियल इंटेलिजन्स अँड मशीन लर्निंग) आणि बी.टेक (आर्टिफिशियल इंटेलिजन्स अँड डेटा सायन्स) हे चार वर्षांचे पदवी अभ्यासक्रम सुरू करण्यात आले आहेत. डीप लर्निंग, कॉम्प्युटर व्हिजन, नॅचरल लँग्वेज प्रोसेसिंग, जनरेटिव्ह AI, डेटा अॅनालिटिक्स आणि इंटेलिजंट सिस्टिम्स यांसारख्या आधुनिक विषयांचा अभ्यासक्रमात समावेश करण्यात आला आहे.
पत्रकार परिषदेत कुलगुरू प्रा. डॉ. राजेश एस., प्र-कुलगुरू डॉ. रामचंद्र पुजेरी आणि अधिष्ठाता डॉ. गणेश पाठक यांनी या उपक्रमाची माहिती दिली. विद्यार्थ्यांना पहिल्याच सत्रापासून उद्योगांशी संबंधित प्रकल्प, वास्तविक डेटासेट्स आणि आधुनिक AI साधनांवर काम करण्याची संधी दिली जाणार असल्याचे त्यांनी सांगितले.
राष्ट्रीय शिक्षण धोरण २०२० शी सुसंगत असलेल्या या अभ्यासक्रमात हेल्थकेअर, फिनटेक, अॅग्रीटेक, जनरेटिव्ह AI आणि एजेंटिक AI यांसारख्या क्षेत्रांमध्ये विशेष शिक्षण दिले जाणार आहे. तसेच AWS Academy, Coursera आणि edX सारख्या जागतिक प्लॅटफॉर्म्सच्या सहकार्याने विद्यार्थ्यांना अतिरिक्त प्रमाणपत्र अभ्यासक्रम उपलब्ध होणार आहेत. .
लोणी काळभोर येथील अत्याधुनिक कॅम्पसमध्ये AI प्रयोगशाळा, स्मार्ट क्लासरूम्स, GPU-TPU आधारित संगणकीय सुविधा आणि संशोधन केंद्रे उपलब्ध असतील. विद्यार्थ्यांना शैक्षणिक मार्गदर्शकासोबत उद्योग मार्गदर्शकाचीही मदत मिळणार आहे.
प्र-कुलगुरू डॉ. रामचंद्र पुजेरी यांनी सांगितले की, कृत्रिम बुद्धिमत्तेच्या नैतिक वापरावर विशेष भर देण्यात येणार असून डेटा गोपनीयता, AI गव्हर्नन्स आणि सामाजिक जबाबदारी यांसारखे विषय अभ्यासक्रमाचा महत्त्वाचा भाग असतील.
विद्यापीठाचे कार्याध्यक्ष तथा प्र-कुलपती प्रा. डॉ. मंगेश कराड यांनी सांगितले की, “तांत्रिक कौशल्यांसोबत नैतिक मूल्ये आणि मानवी संवेदनशीलता जपणारे AI नेतृत्व घडविणे हीच या स्कूलची प्रमुख उद्दिष्टे आहेत.”
✍🏻मुख्य संपादक – रोहिदास कदम
