आळंदी पोस्ट ऑफिसचा हलगर्जी कारभार; नागरिकांची गैरसोय असह्य – सुविधा न दिल्यास शिवसेनेचा आंदोलनाचा इशारा
आळंदी, दि. ३ (प्रतिनिधी : सचिन शिंदे) – लाखो वारकऱ्यांचे श्रद्धास्थान असलेल्या आळंदी शहरातील पोस्ट कार्यालयाचा कारभार नागरिकांच्या संतापाचा विषय ठरत असून, गेल्या तब्बल ५० वर्षांपासून धर्मशाळेच्या जागेत अत्यंत अपुऱ्या आणि गैरसोयीच्या जागेत पोस्ट कार्यालय सुरू आहे. नागरिकांना साधे प्रतीक्षालय, बसण्याची व्यवस्था किंवा ऊन, वारा, पाऊस यापासून संरक्षणाची सुविधा नसल्याने ग्राहकांना रस्त्यावर उभे राहून सेवा घ्यावी लागत असल्याचे वास्तव समोर आले आहे.
विशेष म्हणजे, पोस्ट कार्यालयासाठी आरक्षित जागा उपलब्ध असतानाही भारतीय टपाल विभागाकडून स्वतःच्या जागेवर आधुनिक इमारत उभारण्याबाबत कोणतीही ठोस कार्यवाही करण्यात आलेली नसल्याचा आरोप आळंदी शहर शिवसेना प्रमुख राहुल ज्ञानेश्वर चव्हाण यांनी केला आहे. आळंदीसारख्या धार्मिक आणि ऐतिहासिक शहरात अत्याधुनिक पोस्ट कार्यालय उभारून नागरिकांना दर्जेदार सुविधा देण्यात याव्यात, अशी मागणी त्यांनी संबंधित विभागाकडे केली आहे. तसेच येत्या काही महिन्यांत परिस्थितीत सुधारणा झाली नाही तर शिवसेनेच्या वतीने तीव्र आंदोलन छेडण्यात येईल, असा इशाराही त्यांनी दिला आहे.
आळंदीमध्ये वर्षभर भाविकांची मोठी वर्दळ असते. विशेषतः आषाढी आणि कार्तिकी वारीच्या काळात लाखो वारकरी येथे दाखल होत असतात. मात्र अशा महत्त्वाच्या शहरातील पोस्ट कार्यालय आजही अत्यंत अपुऱ्या जागेत कार्यरत आहे. पावसाळ्यात कार्यालय परिसरात पाणी साचणे, छताला गळती लागणे, ग्राहकांना उभे राहण्यासाठी जागा नसणे, ज्येष्ठ नागरिक, महिला आणि दिव्यांगांना होणारा त्रास, तसेच बँकिंग व टपाल सेवा घेण्यासाठी होणारी प्रचंड गैरसोय यामुळे नागरिकांमध्ये तीव्र नाराजी व्यक्त होत आहे.
नवीन पोस्ट कार्यालयात प्रशस्त प्रतीक्षालय, पावसापासून संरक्षणाची व्यवस्था, वाहनतळ, दिव्यांगांसाठी रॅम्प, स्वच्छतागृह, डिजिटल सेवा केंद्र, पुरेशी कर्मचारी संख्या आणि आधुनिक सुविधा उपलब्ध करून देण्याची मागणी करण्यात आली आहे.
भारतीय टपाल विभाग आणि संबंधित प्रशासनाने तातडीने पाहणी करून नागरिकांच्या अडचणींची दखल घ्यावी व पोस्ट कार्यालयाचे सुरक्षित आणि प्रशस्त ठिकाणी स्थलांतर करावे किंवा नवीन अत्याधुनिक इमारत उभारण्याचा निर्णय घ्यावा, अशी जोरदार मागणी नागरिकांमधून होत आहे. आळंदीसारख्या जागतिक कीर्तीच्या तीर्थक्षेत्रात आधुनिक आणि सुसज्ज पोस्ट कार्यालय उभारणे ही आता केवळ मागणी नसून काळाची गरज बनली आहे. 
✍🏻मुख्य संपादक – रोहिदास कदम
