पुणे /प्रतिनिधी रोहिदास कदम
मिळालेल्या माहिती अनुषंगाने अयोध्येतील राम मंदिरातील दानपेटीतील रक्कम चोरीप्रकरणी पोलिसांनी मोठी कारवाई करत मंदिरातील एका कर्मचाऱ्याच्या घरातून सुमारे ₹१० लाखांची रोकड जप्त केली आहे. ही रक्कम घरातील कपाटात तसेच शेणाच्या ढिगाऱ्याखाली लपवून ठेवण्यात आल्याचे तपासात समोर आले आहे.
मिळालेल्या माहितीनुसार, संबंधित कर्मचारी मंदिरात भाविकांकडून येणाऱ्या दानरकमेची मोजणी करण्याचे काम करत होता. दानरकमेतील गैरव्यवहाराचा संशय आल्यानंतर पोलिसांनी चौकशी सुरू केली. त्यानंतर कर्मचाऱ्याच्या घरावर टाकलेल्या छाप्यात मोठ्या प्रमाणात रोकड आढळून आली.
पोलिसांनी जप्त केलेल्या पैशांचा आणि चोरी झालेल्या दानरकमेचा संबंध तपासला जात असून, या प्रकरणात आणखी काही जणांचा सहभाग आहे का याचाही शोध घेतला जात आहे.
या घटनेमुळे राम मंदिर प्रशासनात खळबळ उडाली असून, दानरकमेच्या सुरक्षेबाबत प्रश्नचिन्ह निर्माण झाले आहे. पोलिस तपास सुरू असून, दोषींवर कठोर कारवाई होण्याची शक्यता व्यक्त केली जात आहे.
✍🏻मुख्य संपादक – रोहिदास कदम
