आळंदी | प्रतिनिधी.माऊली घुंडरे
आळंदी येथील वडमुखवाडी परिसरातील श्री संत ज्ञानेश्वर महाराज थोरल्या पादुका देवस्थान ट्रस्ट यांच्या वतीने अधिक मासानिमित्त भव्य दिव्य त्रिदिनी सप्ताहाचे आयोजन करण्यात आले आहे. अशी माहिती ट्रस्टचे संस्थापक अध्यक्ष ॲड. विष्णू तापकीर यांनी दिली.
या धार्मिक मंगलमय अधिक मास पर्वणीत दररोज सकाळी काकडा, भजन, दुपारी महिला भजनी मंडळाचे भजन, सायंकाळी हरिपाठ तसेच रात्री हरिकीर्तन सेवा आयोजित करण्यात आली आहे. कीर्तनानंतर भाविकांसाठी महाप्रसादाचे वाटप करण्यात येणार असून रात्री १० ते १२ या वेळेत जागर कार्यक्रमही होणार आहे.
या सप्ताहाचा शुभारंभ गुरुवार, ११ जून रोजी होणार असून रविवारी, १४ जून रोजी हरिनाम गजरात सांगता होईल. या धार्मिक पर्वणीचे आयोजन श्री संत ज्ञानेश्वर महाराज थोरल्या पादुका देवस्थान ट्रस्ट, थोरल्या पादुका तरुण भजनी मंडळ आणि स्वकाम सेवा मंडळ यांच्या संयुक्त विद्यमाने करण्यात आले आहे.
सप्ताहादरम्यान दररोज सायंकाळी ७ ते ९ या वेळेत ह.भ.प. भागवत महाराज कचरे (पहिला दिवस), ह.भ.प. मल्लेश महाराज चिंतले (दुसरा दिवस) आणि ह.भ.प. सोपान महाराज शिंदे (तिसरा दिवस) यांची कीर्तन सेवा होणार आहे. तसेच रविवारी सकाळी १० ते १२ या वेळेत ह.भ.प. महेंद्र महाराज नलावडे यांचे काल्याचे कीर्तन होणार असून हरिनाम गजर व महाप्रसाद वाटपाने सप्ताहाची सांगता करण्यात येणार आहे.
अधिक मासाच्या या पुण्य पर्वकाळातील धार्मिक उत्सवात भाविकांनी मोठ्या संख्येने सहभागी व्हावे, असे आवाहन ॲड. विष्णू तापकीर यांनी केले आहे.
— मानव मित्र न्यूजचं माऊली घुंडरे
✍🏻मुख्य संपादक – रोहिदास कदम
