(घनसावंगी तालुक्यात राहुल बोबडे )तीर्थपुरी नगरपंचायत अंतर्गत घरकुल योजनेच्या हजारो लाभार्थ्यांसाठी दिलासादायक आणि आनंदाची बातमी समोर आली आहे. घरकुलच्या दुसऱ्या व तिसऱ्या हप्त्याची प्रक्रिया अंतिम टप्प्यात पोहोचली असून संबंधित बँक खात्यांवरील आवश्यक मंजुरीच्या सह्या पूर्ण झाल्याची माहिती मिळाली आहे. आता घनसावंगी येथे संबंधित वरिष्ठ अधिकाऱ्यांच्या अंतिम सह्या होताच येत्या मंगळवार किंवा बुधवारी लाभार्थ्यांच्या खात्यावर थेट हप्ता जमा होण्याची शक्यता व्यक्त करण्यात येत आहे.
या पार्श्वभूमीवर लाभार्थ्यांमध्ये उत्साहाचे वातावरण निर्माण झाले असून अनेकांनी घरकुलाच्या पुढील बांधकामाची तयारी सुरू केली आहे. नगरपंचायत प्रशासनाकडून लाभार्थ्यांना बँक खाते सक्रिय ठेवण्याचे तसेच आधार लिंक असल्याची खात्री करून घेण्याचे आवाहन करण्यात आले आहे. डीबीटी प्रक्रियेद्वारे हप्ता जमा होणार असल्याने मोबाईलवर येणाऱ्या बँक मेसेजवर लक्ष ठेवण्यास सांगितले आहे.
दरम्यान, संभाजीनगर येथे येत्या २५ किंवा २६ तारखेला आंदोलन होण्याची शक्यता असल्याची माहिती प्रतिनिधी राहुल बोबडे यांनी दिली. घरकुल योजनेचा रखडलेला निधी लवकरात लवकर मिळावा, अशी लाभार्थ्यांची अपेक्षा असून आता प्रत्यक्ष खात्यावर हप्ता जमा होण्याकडे सर्वांचे लक्ष लागले आहे.
✍🏻मुख्य संपादक – रोहिदास कदम
