विभागाच्या कार्यालयांची तपासणी सुरू
पुणे (प्रतिनिधी( अशोक कुंभार,)महाराष्ट्र जमीन महसूल कायद्यातील कलम 155 चा वापर करून जमीन नोंदींमध्ये दुरुस्ती करताना काही ठिकाणी सातबारा (7/12) उताऱ्यावर चुकीच्या नोंदी केल्या जात असल्याचे प्रशासनाच्या निदर्शनास आले आहे. या प्रकारामुळे जमीन व्यवहारांमध्ये गोंधळ निर्माण होत असल्याने जिल्हा प्रशासनाने संबंधित मंडळ अधिकारी, तहसीलदार आणि ग्राम महसूल अधिकाऱ्यांच्या कार्यालयांची तपासणी करण्याचे आदेश दिले आहेत.
माहितीनुसार, मालकी हक्क, क्षेत्रफळ किंवा इतर नोंदींमध्ये फेरफार करताना नियमांचे पालन न करता नोंदी मंजूर केल्या जात असल्याची तक्रार वाढत आहे. त्यामुळे प्रशासनाने हा प्रकार गंभीरपणे घेत तपासणी मोहीम सुरू केली आहे.
ज्या प्रकरणांमध्ये चुकीच्या नोंदी आढळतील, त्या प्रकरणांमध्ये संबंधित अधिकाऱ्यांकडून खुलासा मागवून दोष सिद्ध झाल्यास शिस्तभंगाची कारवाई करण्यात येणार असल्याचे प्रशासनाने स्पष्ट केले आहे.
दरम्यान, काही ठिकाणी अर्जदारांच्या नोंदी नामंजूर करताना त्यांना योग्य प्रकारे नोटीस दिली जात नसल्याचेही निदर्शनास आले आहे. यामुळे अर्जदारांना उपविभागीय अधिकाऱ्यांकडे अपील करावे लागत असल्याने ही बाब गंभीर मानली जात आहे.
जिल्हा प्रशासनाने सर्व महसूल अधिकाऱ्यांना नियमांचे काटेकोर पालन करण्याचे निर्देश दिले असून, चुकीच्या पद्धतीने नोंदी मंजूर करण्याच्या प्रकारांना आळा घालण्याचा प्रयत्न सुरू केला आहे.
✍🏻मुख्य संपादक – रोहिदास कदम
