🚩 बैलजोडीचा तिढा अखेर सुटला! श्रींच्या रथासाठी रानवडे घराण्याच्या बैलजोडीची निवड निश्चित 🚩

आळंदी | (प्रतिनिधी माऊली घुंडरे)
श्री संत ज्ञानेश्वर महाराजांच्या आषाढी वारी पालखी सोहळ्यातील श्रींचा रथ ओढण्यासाठी कोणत्या बैलजोडीला मान मिळणार याबाबतचा तिढा अखेर सुटला असून, यंदाच्या वर्षी स्थानिक रानवडे घराण्यातील हर्षवर्धन प्रदीप रानवडे आणि तुळशीराम ज्ञानोबा रानवडे यांच्या बैलजोडीस मानाचा बहुमान जाहीर करण्यात आला आहे.
बैलजोड निवड समितीचे अध्यक्ष बबनराव कुऱ्हाडे पाटील यांनी यासंदर्भातील अधिकृत निर्णयाचे पत्र श्री ज्ञानेश्वर महाराज संस्थान कमिटीचे पालखी सोहळा प्रमुख ॲड. राजेंद्र उमाप तसेच मुख्य विश्वस्त डॉ. भावार्थ देखणे यांना सुपूर्द केले. त्यानंतर संस्थानकडे संबंधित मानकरी बैलजोडीची अधिकृत नोंद करण्यात आली.
यावर्षी रोटेशन पद्धतीनुसार रानवडे घराण्याकडे बैलजोडीचा मान येत असल्याने प्राप्त अर्जांची छाननी करून समितीने हर्षवर्धन रानवडे व तुळशीराम रानवडे यांच्या बैलजोडीची निवड निश्चित केली.
समितीच्या निर्णयानुसार आळंदी ते फलटण आणि परतीच्या प्रवासात फलटण ते आळंदी या टप्प्यात हर्षवर्धन रानवडे सेवा बजावतील, तर फलटण ते पंढरपूर आणि पंढरपूर ते फलटण या मार्गावर तुळशीराम रानवडे यांची बैलजोडी श्रींच्या रथसेवेत सहभागी होणार आहे.
या निवडीस दोन्ही मानकरींनी संमती दर्शवून निवडीचे पत्र स्वीकारले असल्याची माहिती बैलजोड निवड समितीचे सदस्य तथा माजी उपनगराध्यक्ष नंदकुमार कुऱ्हाडे पाटील यांनी दिली.
यावेळी बैलजोड निवड समितीचे अध्यक्ष बबनराव कुऱ्हाडे पाटील, विलास घुंडरे पाटील, रामदास भोसले, ज्ञानोबा वहीले, सचिन रानवडे, तुळशीराम रानवडे आणि हर्षवर्धन रानवडे उपस्थित होते.
श्रींच्या पालखी सोहळ्यातील सर्वांत मानाच्या सेवांपैकी एक मानली जाणारी रथाच्या बैलजोडीची निवड जाहीर झाल्याने वारकरी आणि भाविकांमध्ये समाधानाचे वातावरण निर्माण झाले आहे.

🔥 बैलजोडीचा तिढा अखेर मिटला; श्रींच्या रथसेवेसाठी रानवडे घराण्याच्या बैलजोडीला मान 🔥
मानव मित्र न्यूज | आळंदी

Manav Mitra News

✍🏻मुख्य संपादक – रोहिदास कदम