पुरंदर |( मानव मित्र न्यूज अशोक कुंभार)
पुरंदर तालुक्यातील शिवरी गावातील इनाम वस्ती येथे स्थानिक आमदार विकास निधीतून करण्यात आलेल्या विकासकामांबाबत ग्रामस्थांनी गंभीर आक्षेप घेतले आहेत. मंजूर अंदाजपत्रकानुसार (इस्टिमेट) काम झाले नसून निकृष्ट दर्जाचे साहित्य वापरण्यात आल्याचा आरोप ग्रामस्थांनी केला आहे.
ग्रामस्थांच्या म्हणण्यानुसार, संबंधित विकासकामांमध्ये अनेक त्रुटी आढळून आल्या आहेत. याबाबत ठेकेदाराकडे वारंवार तक्रार करूनही कोणतीही दखल घेतली जात नसल्याचा आरोप करण्यात आला आहे. उलट “काम इस्टिमेटप्रमाणेच झाले आहे, तुम्हाला जे करायचे ते करा” अशी उडवाउडवीची उत्तरे दिली जात असल्याचे ग्रामस्थांचे म्हणणे आहे.
या पार्श्वभूमीवर ग्रामस्थांनी सार्वजनिक बांधकाम विभागाच्या उपअभियंत्यांना निवेदन देऊन संबंधित कामांची प्रत्यक्ष पाहणी करण्याची मागणी केली आहे. तसेच मंजूर अंदाजपत्रकाची प्रत मराठी भाषेत उपलब्ध करून देण्यात यावी, कामाची तांत्रिक चौकशी करण्यात यावी आणि दोषी अधिकारी व ठेकेदारांवर कारवाई करण्यात यावी, अशी मागणी करण्यात आली आहे.
ग्रामस्थांनी स्पष्ट इशारा दिला आहे की, प्रशासनाने तातडीने कारवाई न केल्यास 20 जुलै 2026 पासून लोकशाही मार्गाने बेमुदत उपोषण आंदोलन सुरू करण्यात येईल. आंदोलनादरम्यान कोणतीही अनुचित घटना घडल्यास किंवा आंदोलनकर्त्यांची प्रकृती बिघडल्यास त्यास संबंधित प्रशासन जबाबदार राहील, असेही निवेदनात नमूद करण्यात आले आहे.
या आंदोलनात विकास काशिनाथ निंभोरे, महादेव बाळासो खोमणे, संजय सुदाम खोमणे, दत्तात्रेय बाळासाहेब खोमणे, दत्तात्रेय अशोक खोमणे, दत्तात्रेय लिंबोरे, अजय विजय लिंबोरे, ईश्वर अशोक खोमणे, सचिन लहू कामठे यांच्यासह शिवरी गावातील अनेक ग्रामस्थ सहभागी होणार आहेत.
आता सार्वजनिक बांधकाम विभाग आणि प्रशासन या तक्रारींची कितपत गांभीर्याने दखल घेते, याकडे संपूर्ण शिवरी गावासह पुरंदर तालुक्याचे लक्ष लागले आहे.:
🔴 “शिवरीतील विकासकामांवर ग्रामस्थांचा आक्षेप; 20 जुलैपासून बेमुदत उपोषणाचा इशारा”.
✍🏻मुख्य संपादक – रोहिदास कदम
