🇮🇳 रासे गावच्या भूमिपुत्राचा अभिमानास्पद गौरव! २४ वर्षे भारतीय सैन्यात देशसेवा करून जयेश शिंदे सेवानिवृत्त 🇮🇳

July 3, 2026

7

रासे (प्रतिनिधी माऊली घुंडरे) : देशसेवा हीच ईश्वरसेवा मानत तब्बल २४ वर्षे भारतीय सैन्य दलात प्रामाणिकपणे कर्तव्य बजावणारे रासे गावचे सुपुत्र जयेश मारुती शिंदे यांची सन्मानपूर्वक सेवानिवृत्ती झाल्याने संपूर्ण गावाने त्यांचा अभूतपूर्व गौरव केला. या निमित्ताने त्यांच्या बालमित्रांनी आणि ग्रामस्थांनी भव्य स्वागत सोहळ्याचे आयोजन करून देशभक्त सैनिकाला मानवंदना दिली.
डीजेच्या दणदणाटात, आकर्षक रांगोळ्या, फटाक्यांची आतषबाजी आणि घोषणांच्या गजरात जयेश शिंदे यांचे गावात जंगी स्वागत करण्यात आले. यावेळी त्यांचे कुटुंबीय, मित्रपरिवार, ग्रामस्थ, तरुण वर्ग, पदाधिकारी आणि शिक्षक मोठ्या संख्येने उपस्थित होते.
कार्यक्रमात उपस्थित मान्यवरांनी आपल्या भाषणातून एका कष्टकरी शेतकरी कुटुंबातील मुलाने जिद्द, चिकाटी आणि अथक परिश्रमाच्या बळावर भारतीय सैन्य दलात भरती होऊन देशसेवेचा मान मिळवला, याचा गौरवपूर्ण उल्लेख केला. तसेच त्यांच्या संघर्षमय जीवनप्रवासाचा आढावा घेत पुढील आयुष्यासाठी शुभेच्छांचा वर्षाव केला.
यावेळी बोलताना जवान जयेश शिंदे यांनी सैन्यदलातील २४ वर्षांच्या सेवाकाळातील विविध अनुभव उपस्थितांसमोर मांडले. देशासाठी सेवा करताना आलेले आव्हानात्मक प्रसंग, शिस्त, कर्तव्यनिष्ठा आणि राष्ट्रप्रेम याबाबत त्यांनी प्रेरणादायी विचार व्यक्त केले.
विशेष म्हणजे, २४ वर्षांच्या प्रदीर्घ सेवाकाळात कोणत्याही प्रकारचे व्यसन न करता त्यांनी आदर्श जीवन जगले. याच पार्श्वभूमीवर त्यांनी तरुणांना सैन्य दलात भरती होण्याचे आवाहन करत “देशसेवा करा, शिस्तप्रिय बना आणि व्यसनांपासून दूर राहा” असा मोलाचा संदेश दिला.
रासे गावातील या देशभक्त सैनिकाच्या गौरव सोहळ्याने उपस्थितांच्या मनात राष्ट्रप्रेमाची भावना जागृत झाली. जयेश शिंदे यांची देशसेवा, त्याग आणि कर्तव्यनिष्ठा ही नव्या पिढीसाठी प्रेरणादायी ठरणारी असल्याची भावना यावेळी सर्व स्तरातून व्यक्त करण्यात आली.
— मानव मित्र न्यूज 🇮🇳.
“देशासाठी जगणाऱ्यांचा सन्मान, हीच खरी राष्ट्रभक्ती!”