पुरंदर सासवड| प्रतिनिधी अशोक कुंभार
महाराष्ट्र कृषी दिनाचे औचित्य साधून “डॉक्टर आपल्या दारी” या शासनाच्या उपक्रमांतर्गत पशुवैद्यकीय चिकित्सालय, जेजुरी यांच्या वतीने ग्रामपंचायत कोळविहिरे हद्दीतील कुदळेवाडी येथे जंत निर्मूलन शिबिराचे यशस्वी आयोजन करण्यात आले. ग्रामीण भागातील पशुधनाचे आरोग्य सुदृढ ठेवण्याच्या उद्देशाने आयोजित या शिबिराला पशुपालक, गोपालक व दुग्ध व्यवसायिकांचा उत्स्फूर्त प्रतिसाद लाभला.
शिबिरादरम्यान जनावरांच्या आरोग्याची तपासणी करून जंतनाशक औषधांचे वाटप करण्यात आले. तसेच प्राथमिक उपचारासाठी आवश्यक औषधे व गोळ्यांचेही वितरण करण्यात आले. या उपक्रमातून एकूण १५० जनावरांना जंत निर्मूलनासाठी औषधांचा लाभ देण्यात आला.
यावेळी उपस्थित पशुपालकांना शासनाच्या “मुख्यमंत्री ग्रामीण उद्योजकता” योजनेची सविस्तर माहिती देण्यात आली. योजनेची माहितीपत्रके वाटप करून विविध शासकीय योजनांचा लाभ घेण्याचे आवाहनही करण्यात आले.
या प्रसंगी कोळविहिरे गावचे माजी सरपंच व डेअरीचे चेअरमन सचिन कुदळे, सहाय्यक पशुधन विकास अधिकारी डॉ. भूषण लोखंडे (पशु चिकित्सालय, जेजुरी), आदर्श गोपालक मेजर विठ्ठल झगडे, रवी टेकवडे, महेश कुदळे, सागर कुदळे, ग्रामपंचायतीचे सदस्य तसेच परिसरातील अनेक गोपालक, पशुपालक आणि शेतकरी मोठ्या संख्येने उपस्थित होते.
ग्रामीण भागातील पशुधनाचे आरोग्य जपण्यासाठी अशा प्रकारच्या जंत निर्मूलन शिबिरांची आवश्यकता असून, भविष्यातही असे उपक्रम सातत्याने राबविण्यात यावेत, अशी अपेक्षा उपस्थितांनी व्यक्त केली. 
✍🏻मुख्य संपादक – रोहिदास कदम
