भोर तालुका प्रतिनिधी सचिन शिंदे
विनापरवानगी फर्निचर कामांची तक्रार; मुख्याधिकाऱ्यांची धडक कारवाई, शहरात राजकीय खळबळ
पुणे जिल्ह्यातील भोर नगरपालिकेत रविवारी अभूतपूर्व प्रशासकीय कारवाई करण्यात आली. आवश्यक प्रशासकीय मंजुरी न घेता नगराध्यक्ष आणि उपनगराध्यक्ष यांच्या दालनात फर्निचरची कामे केल्याची तक्रार प्राप्त झाल्यानंतर मुख्याधिकारी गजानन शिंदे यांनी दोन्ही दालने सील करण्याचा निर्णय घेतला.
नगरपालिकेच्या इतिहासात प्रथमच अशा प्रकारची कारवाई झाल्याने शहरात मोठी चर्चा रंगली आहे. संबंधित कामे नियमानुसार मंजुरीशिवाय करण्यात आल्याचा आरोप असून, त्याची चौकशी सुरू करण्यात आली आहे.
या घटनेमुळे स्थानिक राजकारणातही खळबळ उडाली आहे. भाजप आणि राष्ट्रवादी काँग्रेस (अजित पवार गट) यांच्यातील राजकीय वादाच्या पार्श्वभूमीवर या कारवाईकडे विशेष लक्ष वेधले जात आहे. संबंधित प्रकरणाची सखोल चौकशी झाल्यानंतर पुढील प्रशासकीय निर्णय घेतले जाण्याची शक्यता आहे.
प्रशासनाने नियमांचे पालन करण्याबाबत कोणतीही तडजोड केली जाणार नसल्याचे संकेत या कारवाईतून मिळत असून, भोर नगरपालिकेतील पुढील घडामोडींवर सर्वांचे लक्ष लागले आहे.
✍🏻मुख्य संपादक – रोहिदास कदम
