भिवरी (प्रतिनिधी.अशोक कुंभार
भिवरी–बोपगाव येथील श्री कानिफनाथ मंदिर परिसरात दर्शनासाठी आलेली आणि गर्दीत हरवलेली दोन लहान मुले भिवरी गावातील जागरूक तरुणांच्या सतर्कतेमुळे व सासवड पोलिसांच्या तत्परतेमुळे सुखरूप आपल्या आईच्या कुशीत परतली. या घटनेमुळे परिसरात तरुणांच्या सामाजिक जाणिवेचे सर्वत्र कौतुक होत आहे.
हडपसर (सातव नगर) येथील रहिवासी असलेल्या श्रीमती श्रीदेवी दुधभाते या आपल्या बहिणीच्या मुलासोबत व स्वतःच्या मुलांसह कानिफनाथ गडावर दर्शनासाठी आल्या होत्या. दर्शनासाठी झालेल्या गर्दीत गणेश खंडाप्पा मरगे व मान्तेश बिराप्पा दुधभाते ही दोन लहान मुले आईच्या नजरेतून सुटून रस्ता चुकत भिवरी गावाच्या परिसरात पोहोचली.
घाबरलेल्या अवस्थेतील ही मुले स्थानिक तरुण आर्यन श्रीकांत येळंवडे, स्वराज संतोष कटके, सारंग तुषार कटके, करुण अजय ढवळे, विवेक नानासो येळंवडे आणि तन्मय योगेश कटके यांच्या निदर्शनास आली. मुलांकडे चौकशी केली असता ती हरवलेली असल्याचे लक्षात येताच, या तरुणांनी वेळ न दवडता सासवड पोलीस स्टेशनशी संपर्क साधून मुलांना स्वतः पोलिसांच्या ताब्यात दिले.
सासवड पोलीस स्टेशनचे पी.एस.आय. अर्जुन चोरगे, अविनाश होळकर व अक्षय चिले यांनी घटनेचे गांभीर्य ओळखून तातडीने तपास सुरू केला. मुलांच्या नातेवाईकांचा शोध घेऊन हडपसर येथील त्यांच्या आईशी संपर्क साधण्यात आला. आवश्यक कायदेशीर प्रक्रिया पूर्ण करून दोन्ही मुलांना त्यांच्या आई श्रीदेवी दुधभाते यांच्या स्वाधीन करण्यात आले.
आपली मुले सुखरूप मिळाल्याने दुधभाते कुटुंबीयांनी भिवरीतील तरुण आणि सासवड पोलीस प्रशासनाचे डोळ्यात पाणी आणून आभार मानले. तरुणांच्या या सामाजिक बांधिलकीचे व तत्परतेचे सर्वत्र स्वागत होत आहे.
✍🏻मुख्य संपादक – रोहिदास कदम
