पुणे पुरंदर सासवड (प्रतिनिधी अशोक कुंभार)
पुणे महानगर क्षेत्र विकास प्राधिकरण ला पुणे जिल्ह्यातील ८ तालुक्यांमधील शासनाच्या मालकीच्या तब्बल १७४ जागा विनामूल्य हस्तांतरित करण्यात येणार आहेत. या जागांचे एकूण क्षेत्रफळ सुमारे १ हजार ८७८.७६ हेक्टर इतके असून, भविष्यातील नागरी विकास प्रकल्पांसाठी हा मोठा निर्णय मानला जात आहे.
जिल्हाधिकारी जितेंद्र डुडी यांनी दिलेल्या माहितीनुसार, राज्य शासनाने गतवर्षी याबाबत आदेश जारी केले होते. त्यानुसार जिल्हा प्रशासनाने जागा हस्तांतरणाची प्रक्रिया सुरू केली आहे.
अतिक्रमण रोखण्यासाठी मोठा निर्णय
पुणे जिल्ह्यातील अनेक सरकारी जागा अनेक वर्षांपासून पडून होत्या. काही ठिकाणी अतिक्रमण झाले असून, इतर जागांवरही अतिक्रमणाचा धोका वाढला होता. त्यामुळे शासनाने या जागांचा उपयोग पायाभूत सुविधा, रस्ते, गृहनिर्माण, सार्वजनिक सुविधा आणि नागरी विकास प्रकल्पांसाठी करण्याचा निर्णय घेतला आहे.
या निर्णयामुळे भविष्यात पुणे महानगर क्षेत्रात नवीन विकास प्रकल्पांना गती मिळण्याची शक्यता आहे.
तालुकानिहाय जागांची आकडेवारी
हवेली – २६ जागा – ३७२.७७ हेक्टर
मावळ – ४५ जागा – ३३१.७७ हेक्टर
मुळशी – १७ जागा – ९५.९१ हेक्टर
दौंड – ४ जागा – ८.४९ हेक्टर
शिरूर – २० जागा – १११.७० हेक्टर
पुरंदर – ७ जागा – २२१.७६ हेक्टर
भोर – १० जागा – २२.३० हेक्टर
खेड – ४५ जागा – ७१४.०६ हेक्टर
एकूण
१७४ जागा
१,८७८.७६ हेक्टर क्षेत्र
या निर्णयामुळे पुणे महानगर क्षेत्रातील भविष्यातील नागरी नियोजन आणि विकास प्रकल्पांना मोठे व्यासपीठ उपलब्ध होणार असल्याचे मानले जात आहे
✍🏻मुख्य संपादक – रोहिदास कदम
