पोमगाव (ता. मुळशी, जि. पुणे) | मानव मित्र न्यूज
मुसळधार पावसाने पुणे जिल्ह्यातील मुळशी तालुक्यात मोठी दुर्घटना घडवली आहे. पोमगाव (गुरववाडी) येथील श्री जगद्गुरु प्रतिष्ठान संचलित श्री राधा चैतन्य गोशाळेवर मंगळवारी पहाटे सुमारे ३.३० वाजण्याच्या सुमारास डोंगराचा मोठा भाग खचून दरड कोसळली. या भीषण दुर्घटनेत ५ ते ६ गायींचा दुर्दैवी मृत्यू झाला असून ५ ते ६ गायी गंभीर जखमी झाल्या आहेत.
या गोशाळेत सुमारे १५० भाकड गायींचे संगोपन केले जाते. सलग सुरू असलेल्या मुसळधार पावसामुळे डोंगराची माती सैल झाली आणि अचानक मोठी दरड गोशाळेवर कोसळली. काही क्षणांतच गोशाळेचा परिसर माती व दगडांच्या ढिगाऱ्याखाली गेला. गायींचा आक्रोश ऐकून स्थानिक ग्रामस्थ, स्वयंसेवक आणि गोसेवक तातडीने घटनास्थळी दाखल झाले आणि बचावकार्य सुरू करण्यात आले.
गोशाळेचे संस्थापक-अध्यक्ष गोसेवक सचिन महाराज गुरव तसेच भागवताचार्य ह.भ.प. सौ. अंजलीताई सचिन गुरव यांच्या मार्गदर्शनाखाली ही गोशाळा कार्यरत आहे. दुर्घटनेनंतर जखमी गायींवर तातडीने उपचार सुरू करण्यात आले असून त्यांना वाचविण्यासाठी शर्थीचे प्रयत्न सुरू आहेत.
घटनेची माहिती मिळताच गावचे तलाठी आणि ग्रामसेवक यांनी घटनास्थळी भेट देऊन पंचनामा केला. दरड कोसळल्यामुळे गोशाळेचे मोठे आर्थिक नुकसान झाले असून उर्वरित जनावरांच्या सुरक्षिततेचाही प्रश्न निर्माण झाला आहे.
दरम्यान, मुसळधार पावसाच्या पार्श्वभूमीवर डोंगराळ भागातील गोशाळा, शेतवस्त्या आणि घरांच्या सुरक्षिततेचा प्रश्न पुन्हा एकदा ऐरणीवर आला आहे. प्रशासनाने तातडीने नुकसानग्रस्त गोशाळेला आर्थिक मदत द्यावी, तसेच अशा ठिकाणांचे सर्वेक्षण करून आवश्यक प्रतिबंधात्मक उपाययोजना कराव्यात, अशी मागणी स्थानिक नागरिकांनी केली आहे.
✍🏻मुख्य संपादक – रोहिदास कदम
