आळंदी (अशोक कुंभार प्रतिनिधी ) : अक्षय तृतीया निमित्त श्री संत ज्ञानेश्वर महाराज संजीवन समाधी मंदिर येथे श्रींचे वैभवी विठ्ठल रूप चंदनउटीद्वारे साकारण्यात आले. आकर्षक चंदन उटीचे दर्शन घेण्यासाठी भाविकांनी मोठी गर्दी केली होती.
पुण्यातील मूर्तिकार अभिजित धोंडफळे व सहकाऱ्यांनी परिश्रमपूर्वक ही लक्षवेधी चंदन उटी साकारली. श्री ज्ञानेश्वर महाराज संस्थान कमिटी आणि स्वकाम सेवा मंडळ आळंदी यांच्या वतीने ही सेवा उत्साहात पार पडली. अशी माहिती व्यवस्थापक माऊली वीर यांनी दिली.
चैत्र महिन्यातील परंपरेनुसार संजीवन समाधीवर चंदन उटी लावून श्रींचे विठ्ठल रूप साकारण्यात आले. मोगऱ्याच्या फुलांनी सजलेला गाभारा, आकर्षक सजावट आणि श्री ज्ञानेश्वरीची चंदनातील प्रतिकृती हे भाविकांचे विशेष आकर्षण ठरले. महिलांनी चैत्र गौरी पूजनासह श्रींचे दर्शन घेतले.
अक्षय तृतीया निमित्त मंदिरात घंटानाद, काकडा, पवमान अभिषेक, दुधारती, पूजा तसेच हळदी-कुंकू कार्यक्रम उत्साहात पार पडले. कारंजा मंडपात चैत्र गौरी पूजनासाठी आकर्षक सजावट करण्यात आली होती.
देवस्थान आणि स्वकाम सेवा मंडळाच्या वतीने अध्यक्ष सुनील तापकीर, महिला अध्यक्षा आशा तापकीर यांच्यासह सेवकांनी चंदन उटीचे नियोजन केले.
या प्रसंगी देवस्थानचे प्रमुख विश्वस्त भावार्थ देखणे, योगी निरंजन नाथसाहेब, चैतन्य महाराज कबीरबुवा लोंढे, पुरुषोत्तम महाराज पाटील, राजेंद्र उमाप, रोहिणी पवार आदींच्या मार्गदर्शनाखाली कार्यक्रम पार पडले. 
दरम्यान, तक्षशिला बुद्ध विहार येथे आळंदी संविधान जागर अभियान अंतर्गत संविधान जनजागृती साहित्याचे वाटप अभियान प्रमुख अर्जुन मेदनकर यांच्या हस्ते करण्यात आले.
अक्षय तृतीया निमित्त श्रींचे विठ्ठल रूप दर्शन घेत भाविकांनी माऊलींचे वैभवी दर्शन डोळ्यांत साठविले.
🙏✨
✍🏻मुख्य संपादक – रोहिदास कदम
