हरगुडे (पुरंदर अशोक कुंभार)नवीन शैक्षणिक वर्षाच्या पार्श्वभूमीवर विद्यार्थ्यांना शिक्षणासाठी आवश्यक साहित्य उपलब्ध करून देण्याच्या उद्देशाने जिल्हा परिषद प्राथमिक शाळा हरगुडे येथे पहिली ते चौथीच्या विद्यार्थ्यांना शालेय दप्तरांचे वाटप करण्यात आले. हा उपक्रम रोटरी क्लब ऑफ इंडिया, पुरंदर यांच्या वतीने आणि कैलासभाऊ धिवार यांच्या विशेष प्रयत्नातून आयोजित करण्यात आला.
याचबरोबर हरगुडे येथील सिद्धार्थनगर परिसरातील सामाजिक कार्यकर्ते सचिनजी धिवार यांच्या वतीने अंगणवाडीतील चिमुकल्या विद्यार्थ्यांनाही दप्तरांचे वाटप करण्यात आले. या उपक्रमामुळे विद्यार्थ्यांच्या चेहऱ्यावर आनंदाचे हास्य फुलले असून शिक्षणासाठी प्रोत्साहन मिळाले आहे.
कार्यक्रमास जिल्हा परिषद प्राथमिक शाळेच्या मुख्याध्यापिका सौ. सीमा लादे, शिक्षिका सौ. स्वाती गायकवाड, सौ. उज्वला ताकवले, सौ. निर्मला ताकवले, सौ. ज्योती जाधव यांची प्रमुख उपस्थिती होती. तसेच बहुजन हक्क परिषदेचे संस्थापक सचिव कैलासभाऊ धिवार, सामाजिक कार्यकर्ते सचिनजी धिवार, सौ. प्राजक्ता धिवार, प्रकाश धिवार, सुधीर धिवार व आदर्श धिवार आदी मान्यवर उपस्थित होते.
यावेळी उपस्थित मान्यवरांनी विद्यार्थ्यांना शिक्षणाचे महत्त्व पटवून देत नियमित शाळेत उपस्थित राहून अभ्यासात प्रगती करण्याचे आवाहन केले. समाजातील दानशूर व्यक्ती आणि सामाजिक संस्थांनी अशा उपक्रमांद्वारे विद्यार्थ्यांच्या शैक्षणिक प्रवासाला बळ देणे ही काळाची गरज असल्याचे मतही व्यक्त करण्यात आले.
शालेय विद्यार्थ्यांच्या उज्ज्वल भविष्यासाठी राबविण्यात आलेल्या या उपक्रमाचे ग्रामस्थ, पालक व शिक्षकांनी स्वागत करत आयोजकांचे आभार मानले.
शिक्षणासाठी हातभार, विद्यार्थ्यांच्या चेहऱ्यावर आनंदाची झळाळी! 📚🎒
✍🏻मुख्य संपादक – रोहिदास कदम
