श्रीरामकृष्ण अध्यात्मिक वारकरी शिक्षण संस्थेतील विद्यार्थ्यांना ब्लॅंकेट वाटप
आळंदी, दि. १४ (वार्ताहर : सचिन शिंदे) –
येथील श्रीरामकृष्ण अध्यात्मिक वारकरी शिक्षण संस्थामधील विद्यार्थ्यांना एकादशीनिमित्त ब्लॅंकेटचे वाटप करण्यात आले. हा उपक्रम बाळकृष्ण महाराज फणसे दिंडी (राजगड तालुका) येथील निष्ठावंत वारकरी स्वर्गीय ह.भ.प. किसनबुवा दामगुडे यांच्या स्मरणार्थ त्यांच्या कुटुंबीय व नातेवाईकांच्या वतीने आयोजित करण्यात आला होता.
या प्रसंगी शिक्षण संस्थेतील विद्यार्थ्यांसह राजगड तालुक्यातील दामगुडासनी, कोदवडी, खरीव व दादवडे येथील वारकऱ्यांना फराळाची पंगत देण्यात आली. सामाजिक व आध्यात्मिक कार्यात सातत्याने योगदान देणाऱ्या श्रीरामकृष्ण अध्यात्मिक वारकरी शिक्षण संस्थेचे अध्यक्ष ह.भ.प. मोहन महाराज शिंदे यांचा राजगड तालुक्याच्या वतीने सत्कार करण्यात आला.
स्वर्गीय किसनबुवा दामगुडे यांनी तब्बल ४० वर्षे अखंड आळंदी–पंढरपूर वारी केली होती. अन्नदान व विविध सामाजिक उपक्रमांत ते नेहमीच पुढाकार घेत असत. वारकरी संप्रदायाची निष्ठेने जोपासना करणारे असे त्यांचे संपूर्ण कुटुंब आजही हा वारसा पुढे चालवत आहे.
या कार्यक्रमास राजगड तालुक्यातील तानाजी शिंदे, मारुती वालगुडे, सोपान रांजणे, राजवडे, दसवडकर आदी मान्यवर उपस्थित होते.
✍🏻मुख्य संपादक – रोहिदास कदम
