पुणे सासवड (प्रतिनिधी अशोक कुंभार ) पुण्यातील बुधवार पेठ परिसरात फरासखाना पोलिसांनी मोठी कारवाई करत पाच बांगलादेशी महिलांना ताब्यात घेतले आहे. रविवारी रात्री उशिरापर्यंत चाललेल्या कॉम्बिंग ऑपरेशनदरम्यान ही कारवाई करण्यात आली. संबंधित महिला बेकायदेशीररीत्या भारतात राहत असल्याची माहिती पोलिसांना मिळाल्यानंतर तपासाची मोहीम राबविण्यात आली होती.
पोलिसांनी संशयित महिलांची चौकशी केली असता त्यांच्याकडे कोणतेही वैध ओळखपत्र, पासपोर्ट किंवा नागरिकत्वासंबंधी कागदपत्रे आढळून आली नाहीत. तसेच प्राथमिक चौकशीत त्या देहव्यापाराशी संबंधित असल्याचा संशयही व्यक्त करण्यात आला आहे. पोलिसांनी त्यांना राष्ट्रगीत तसेच देशाच्या पंतप्रधानांविषयी माहिती विचारली असता समाधानकारक उत्तरे देता आली नसल्याचे सूत्रांनी सांगितले.
या प्रकरणामुळे बुधवार पेठ परिसरात एकच खळबळ उडाली असून नागरिकांकडून पोलिसांच्या कारवाईचे स्वागत करण्यात येत आहे. शहरात बेकायदेशीर वास्तव्य करणाऱ्या परदेशी नागरिकांवर आणखी कठोर कारवाई करण्यात यावी, अशी मागणी स्थानिकांकडून होत आहे. फरासखाना पोलिस पुढील तपास करत असून या महिलांच्या भारतातील प्रवेशाचा मार्ग, संपर्क आणि इतर संबंधित बाबींचा सखोल तपास सुरू आहे.
✍🏻मुख्य संपादक – रोहिदास कदम
