मानव मित्र न्यूज |मुंबई प्रतिनिधी
पुणे व पिंपरी-चिंचवड परिसरात घडलेल्या विषारी दारू दुर्घटनेनंतर राज्यातील यंत्रणा सतर्क झाली असून या प्रकरणाचे धागेदोरे आता ठाणे जिल्ह्यातील भिवंडीपर्यंत पोहोचल्याचे समोर आले आहे. अन्न व औषध प्रशासन (FDA) आयुक्त तुकाराम मुंढे यांच्या नेतृत्वाखाली भिवंडी परिसरात विशेष तपास मोहीम राबविण्यात आली.
तपासादरम्यान संशयित ठिकाणांवर छापे टाकून मेथेनॉलसह विविध रसायनांचा साठा जप्त करण्यात आला. पुणे विषारी दारू प्रकरणात वापरण्यात आलेल्या मेथेनॉलचा पुरवठा या भागातून झाल्याचा संशय व्यक्त करण्यात येत आहे. त्यामुळे या संपूर्ण पुरवठा साखळीचा शोध घेण्यासाठी FDA आणि पोलीस यंत्रणा संयुक्तपणे तपास करत आहेत.
या दुर्घटनेत अनेक नागरिकांचा मृत्यू झाल्यानंतर राज्य सरकारने कठोर भूमिका घेतली असून अवैध दारू निर्मिती आणि विक्री करणाऱ्यांविरोधात व्यापक मोहीम सुरू करण्यात आली आहे. तपास यंत्रणा संबंधित आरोपी, पुरवठादार आणि रसायन विक्रेत्यांची चौकशी करत असून आणखी काही धक्कादायक माहिती समोर येण्याची शक्यता वर्तवली जात आहे.
FDA आयुक्त तुकाराम मुंढे यांनी भेसळखोर आणि बेकायदेशीर व्यवसाय करणाऱ्यांवर कोणतीही दया दाखवली जाणार नसल्याचा इशारा दिला आहे. राज्यभरात अशा कारवाया सुरू राहणार असल्याचेही प्रशासनाने स्पष्ट केले आहे.
✍🏻मुख्य संपादक – रोहिदास कदम
