पिंपरी-चिंचवड | (प्रतिनिधी योगेश भोसले पाटील)
पिंपरी-चिंचवडच्या राजकारणात पुन्हा एकदा मोठी उलथापालथ पाहायला मिळाली असून, उपमुख्यमंत्री तथा राष्ट्रवादी काँग्रेस (अजित पवार गट) चे नेते अजित पवार यांनी भाजपला जोरदार धक्का दिला आहे. भाजपचे माजी नगरसेवक संदीप वाघेरे यांनी राष्ट्रवादी काँग्रेसमध्ये जाहीर प्रवेश केल्याने शहराच्या राजकीय वर्तुळात खळबळ उडाली आहे.
भाजपमध्ये संजोग वाघेरे यांचा प्रवेश झाल्यानंतर संदीप वाघेरे यांनी भाजपला सोडचिठ्ठी दिल्याचे बोलले जात आहे. पक्षांतर्गत डावललेपण, नेतृत्वाबाबत असमाधान आणि स्थानिक राजकारणातील बदलते समीकरणे ही त्यांच्या पक्षबदलामागची प्रमुख कारणे मानली जात आहेत.
संदीप वाघेरे यांच्या राष्ट्रवादी प्रवेशामुळे पिंपरी-चिंचवडमधील राष्ट्रवादी काँग्रेसची ताकद वाढण्याची शक्यता आहे. आगामी महापालिका निवडणुकांच्या पार्श्वभूमीवर हा प्रवेश राष्ट्रवादीसाठी राजकीयदृष्ट्या महत्त्वाचा मानला जात आहे.
या प्रवेशावेळी अजित पवार यांनी भाजपवर अप्रत्यक्ष टीका करत, “जनतेच्या प्रश्नांशी बांधील असणारे कार्यकर्ते राष्ट्रवादी काँग्रेसमध्ये सुरक्षित आहेत. इथे काम करणाऱ्यांना न्याय मिळतो,” असे सूचक वक्तव्य केले.
दरम्यान, संदीप वाघेरे यांच्या प्रवेशामुळे भाजपच्या स्थानिक संघटनांमध्ये अस्वस्थता वाढली असून, आगामी काळात आणखी काही नेते पक्षबदल करतील का, याकडे सर्वांचे लक्ष लागले आहे.
✍🏻मुख्य संपादक – रोहिदास कदम
